«У гэтым годзе Беларусь вярнулася да падаўленьня тых, хто крытыкуе дзяржаўную палітыку».
Пра гэта заявіў спэцдакладчык ААН па Беларусі Міклаш Харасьці, які 26 кастрычніка прадставіў свой даклад па сытуацыі з правамі чалавека ў краіне на 72-й сэсіі Генэральнай Асамблеі ААН у Нью-Ёрку.
«У сваім дакладзе ў мінулым годзе я папярэджваў, наколькі небясьпечная адсутнасьць якіх-небудзь зьменаў у сыстэме кіраваньня ў Беларусі. Нягледзячы на некаторыя фасадныя зьмены ў мэтадах, якія выкарыстоўвае ўлада, па-ранейшаму застаюцца ў дзеяньні тыя ж самыя законы», — сказаў у сваім выступе Харасьці.
Паводле Харасьці, прычыны гвалтоўнага закручваньня гаек у Беларусі, якое ён назваў цыклічным, палягае ў сыстэме кіраваньня, наўпрост залежнай ад кіраўніка краіны.
«…Прэзыдэнт выбудаваў дзяржаўную структуру, якая толькі кансалідуе і абараняе яго ўладу», — сказаў Харасьці.
У сваім выступе спэцдакладчык ААН згадаў пра справу «Белага легіёну».
«У гэтым годзе была сфабрыкаваная справа адносна так званага „Белага легіёну“, таксама былі арыштаваныя палітычныя апанэнты. Гэтая практыка пачалася зноў, як і пяць гадоў таму, бязь нейкіх абвінавачаньняў. Гэта яшчэ адна характарыстыка цыклічнасьці ў галіне правоў чалавека ў Беларусі».
Паводле Харасьці, улады закрылі вочы на доўгі сьпіс рэкамэндацый, як палепшыць сытуацыю ў галіне грамадзянскіх і палітычных правоў.
«У гэтым годзе я, на жаль, магу паведаміць толькі пра нязначныя пасоўваньні ў станоўчым кірунку».
Спэцдакладчык згадаў рэгістрацыю «Гавары праўду» і тое, што Беларусь прадставіла ў Камітэт па правах чалавека даклад, які чакаўся з 2001 году.
«То бок даклад быў прадстаўлены з затрымкай у 16 гадоў. Гэта мерка захаваньня Беларусьсю сваіх дагаворных абавязаньняў».
Таксама Міклаш Харасьці нагадаў, што Беларусь застаецца адзінай краінай амаль ва ўсім паўночным паўшар’і, акрамя ЗША, дзе захоўваецца сьмяротнае пакараньне.
«Улічваючы абмежаваньні ў галіне правоў чалавека, гэты факт — яшчэ адзін дадатковы элемэнт страху для грамадзянаў. Бо яны могуць апынуцца ў судзе за зачыненымі дзьвярыма, дзе ім можа быць вынесены сьмяротны прысуд. І пры гэтым не гарантуюцца ніякія правы чалавека: ні самога асуджанага, ні яго сям’і», — сказаў ён.
Паводле Харасьці, міжнародная супольнасьць павінна быць удзячная, што арганізацыі грамадзянскай супольнасьці не здаліся і працягваюць імкнуцца да паляпшэньня становішча.
Я зноў заклікаю ўлады супрацоўнічаць з маім мандатам
«Я зноў заклікаю ўлады супрацоўнічаць з маім мандатам. У любой форме я гатовы дапамагчы ўраду перайсьці да выкананьня сваіх абавязаньняў», — сказаў спэцдакладчык ААН.
У ліпені Міклаш Харасьці браў удзел у форуме грамадзянскай супольнасьці, які праходзіў у Менску напярэдадні сэсіі Парлямэнцкай асамблеі АБСЭ. Міністэрства замежных спраў Беларусі тады заявіла, што працягвае настойваць на непрызнаньні мандату спэцдакладчыка Рады ААН па сытуацыі з правамі чалавека ў Беларусі — Міклаша Харасьці.
