Валавы ўнутраны прадукт (ВУП) Беларусі вырас на 3,5% за студзень—кастрычнік 2018 году да аналягічнага леташняга пэрыяду, паведамляе Белстат. Адпаведна даручэньню Аляксандра Лукашэнкі прырост ВУП сёлета павінен скласьці ня менш за 3,5% у гадавым вымярэньні.
У грашовым эквіваленце ВУП за першыя 10 месяцаў 2018 году склаў 100,6 мільярда рублёў. За кастрычнік ВУП павялічыўся на 11,83 мільярда рублёў.
Найбольшы ўнёсак у ВУП зрабілі:
- апрацоўчая прамысловасьць — гэта 21,1% ад агульнай лічбы па краіне;
- Менск і Менская вобласьць — 27% і 14,2% ад агульнай лічбы па краіне.
Сёлета ў красавіку МВФ палепшыў прагноз росту ВУП Беларусі ў 2018 годзе: 2,8% замест раней акрэсьленых 0,7%. Паводле прагнозу МВФ, у 2019 годзе ВУП Беларусі складзе 2,4%. Інфляцыю на 2018 год раней прагназавалі ня большай за 7,5%, цяпер — ня большай за 6%.
Эўрапейскі банк рэканструкцыі і разьвіцьця чакае, што беларуская эканоміка ў 2018 годзе вырасьце на 3%. Усясьветны банк прагназуе рост ВУП на 2,9% у 2018 годзе, 2,7% — у 2019-м і 2,5% — у 2020 годзе.
На 2018 год Аляксандар Лукашэнка паставіў задачу росту ВУП на 3,5%. У 2017 годзе валавы ўнутраны прадукт вырас на 2,4%. Прагноз росту на 2017 год быў меншы — 1,7%. ВУП Беларусі падаў два гады запар: мінус 3,8% за 2015 год, мінус яшчэ 2,5% за 2016-ты.
