Прэс-сакратар прэзыдэнта Расеі Дзьмітры Пяскоў заявіў, што ніякіх плянаў ўключэньня Беларусі ў склад Расеі не існуе, а этапы інтэграцыі дзьвюх краін выразна апісаныя ў Саюзнай дамове.
29 сьнежня Аляксандар Лукашэнка знаходзіцца з рабочым візытам у Расеі. Лукашэнка і яго расейскі калега маюць намер «працягнуць размову па актуальных пытаньнях беларуска-расейскага супрацоўніцтва, якія бакі падрабязна абмеркавалі ў розных фарматах на сустрэчы ў Крамлі 25 сьнежня».
Прэс-сакратар расейскага лідэра Дзьмітрый Пяскоў заявіў 29 сьнежня, што Крэмль разглядае перамовы прэзыдэнтаў Расеі і Беларусі як чарговы крок у бок саюзніцкіх адносін, але не чакае ад іх прарыўных рашэньняў.
Як перадае Інтэрфакс, на пытаньне, ці ёсьць пляны далучэньня Беларусі да Расеі, Пяскоў сказаў:
«Тут не трэба быць галаслоўным, тут трэба ўспомніць 1999 год, дакумэнт, на аснове якога мы — РФ і Беларусь — і сталі Саюзнай дзяржавай».
Пяскоў нагадаў, што ў гэтым дакумэнце «ёсьць пэўныя вехі — гэта і фіскальныя справы і г.д., такія крокі на шляху інтэграцыі».
«Вядома, гаворка не ідзе пра нейкі далучэньні і г.д. Гэта хутчэй рух насустрач адзін аднаму, гэта ня рух у адзін бок», — падкрэсьліў прэс-сакратар.
14 сьнежня прэзыдэнт Беларусі Аляксандар Лукашэнка выказаў меркаваньне, што пад выглядам «глыбокай інтэграцыі» Масква хоча інкарпараваць Беларусь у склад Расеі.
Чарговы ўсплёск напружаньня ў беларуска-расейскіх дачыненьнях узьнік пасьля таго, як Масква абвясьціла пра так званы падатковы манэўр, у выніку якога бюджэт Беларусі за наступныя 6 гадоў можа панесьці страты памерам да 10 мільярдаў даляраў.
Што важна ведаць пра расейскі падатковы манэўр
Нафтавы падатковы манэўр у Расеі — паступовая замена спагнаньня экспартнага мыта падаткам на здабычу карысных выкапняў (ПЗКВ). Экспартнае мыта будзе зьмяншацца адначасова з павелічэньнем ПЗКВ.
- Расея пачала рэалізацыю падатковага манэўра зь 2019 году.
- Да канца 2018 году экспарт сырой нафты ў Расеі абкладаўся экспартным мытам у памеры 30% ад цаны. Мыта не спаганялася з паставак на ўнутрырасейскі рынак і ў межах квоты ў Беларусь.
- У 2017-2018 гадах квота на пастаўкі бязмытнай расейскай нафты для Беларусі складала 24 млн тон (18 млн тон перапрацоўвалі беларускаія НПЗ, 6 млн тон ішлі на рээкспарт).
- Беларусь мела права абкладаць экспартным мытам свае нафтапрадукты, вырабленыя з расейскай бязмытнай нафты, якія прадавала ў трэція краіны. Беларускае мыта ішло ў беларускі бюджэт.
Страты і кампэнсацыя
- У сьнежні 2018 г. у адміністрацыі Лукашэнкі сьцьвярджалі, што за 3 апошнія гады Беларусь недаатрымала $3,6 млрд, а за наступныя 4 гады недаатрымае $11 млрд пры найгоршым разьвіцьці падзей.
- Паводле падлікаў рэйтынгавага агенцтва Fitch, наўпроставыя страты беларускай эканомікі складуць $10,6 млрд цягам 2019–2024 гг.
- Дырэктар дасьледніцкага цэнтру ІПМ Аляксандар Чубрык падлічыў, што страты для бюджэту Беларусі ў 2019 годзе склалі $272,3 млн.
- У кастрычніку 2018 Расея абяцала пералічыць у бюджэт Беларусі каля $405 млн у якасьці аплаты экспартнага мыта за нафту. Пазьней у кампэнсацыі адмовілі.
- 18 сьнежня 2019 расейскі партал РБК паведаміў са спасылкай на свае крыніцы, што Расея кампэнсуе Беларусі страты ад манэўра праз зваротны акцыз для беларускіх НПЗ. Суму субсыдыяў ацанілі ў $1,5 млрд. Афіцыйнага пацьвярджэньня гэтай інфармацыі не было.
Кароткая гісторыя нафтагазавых канфліктаў Беларусі і Расеі
