На сайце расейскага міністэрства заклікаюць да «спакойнай рытмічнай працы» «без эмоцыяў і непатрэбных публічных усплёскаў». У МЗС Расеі апраўдваюць Бабіча, але не вінавацяць беларускі бок наўпрост.
Дэпартамэнт інфармацыі і друку Міністэрства замежных справаў Расеі апублікаваў 21 сакавіка «камэнтар да расейска-беларускіх стасункаў», у якім згадаў рэакцыю МЗС Беларусі на інтэрвію расейскага амбасадара Міхаіла Бабіча, апублікаванае тыдзень таму.
Паводле расейскага боку, адбылася «дыскусія аб пэрспэктывах расейска-беларускай супрацоўніцтва, якая вылілася ў мэдыйную прастору» праз рэакцыю беларускага МЗС на інтэрвію Міхаіла Бабіча, які «даў ацэнкі цяперашняму стану расейска-беларускіх стасункаў».
«Увага да гэтых пытаньняў цалкам зразумелая, — піша расейскае ведамства. — Расейцам і беларусам неабыякава, як будуць разьвівацца стасункі між дзьвюма саюзнымі краінамі, асабліва на фоне цяперашняга няпростага міжнароднага становішча, глябальных рызык і выклікаў, якія нарастаюць. З улікам глыбіні і маштабу нашага супрацоўніцтва гэтыя дыскусіі часьцяком набываюць эмацыйны характар, часам, на жаль, выходзячы за межы дыпляматычнай карэктнасьці».
Паводле расейскага боку, ёсьць «прынцыповы момант»: Беларусь зьяўляецца братняй краінай, самым надзейным стратэгічным партнэрам, а дзейнасьць Бабіча накіраваная на рашэньне задачы, пастаўленай Уладзімірам Пуціным — «актыўна паглыбляць узаемадзеяньне ў межах „Саюзнай дзяржавы“».
«Зразумела, у расейска-беларускіх стасунках бываюць сюжэты, па якіх ацэнкі і падыходы бакоў не ва ўсім супадаюць, — дадае расейскі МЗС. — Пры гэтым, аднак, мы заўсёды знаходзілі і знаходзім рашэньні нават самых цяжкіх пытаньняў.
У вырашальнай ступені гэтаму спрыяе тое, што незалежна ад вастрыні праблемы наш дыялёг праходзіць у межах узаемапаважлівага, карэктнага і прафэсійнага абмену думкамі, характэрнага для нашых братніх краінаў. Такім ён павінен заставацца і надалей».
Спрэчка паміж расейскім амбасадарам Бабічам і МЗС Беларусі. Храналёгія
- Чарговае абвастрэньне ў стасунках паміж Беларусьсю і Расеяй пачалося з пытаньня кампэнсацыі Беларусі так званага «падатковага манэўру» расейскіх уладаў. У час напружаных перамоваў амбасадарам быў прызначаны Міхаіл Бабіч — але ад рашэньня Масквы да згоды Менску прайшоў месяц.
- 13 сьнежня 2018 году расейскі прэм’ер-міністар Дзьмітры Мядзьведзеў заявіў, што пажаданых Беларусьсю цэнаў на газ і нафту можна дасягнуць, калі «прасоўвацца на шляху будаўніцтва Саюзнай дзяржавы». Прапанову аб стварэньні адзінага эмісійнага цэнтру, адзінай мытні, суду, падліковай палаты пазьней назавуць «ультыматумам Мядзьведзева». Лукашэнка на наступны дзень заявіў пра шантаж, намёкі на ўключэньне Беларусі ў склад Расеі і разбурэньне краіны — гэтага «ня будзе ніколі», запэўніў ён.
- 14 сакавіка. Апублікавалі інтэрвію, у якім Бабіч завочна паспрачаўся з Лукашэнкам па шматлікіх заявах, агучаных на «Вялікай размове з прэзыдэнтам». Таксама Бабіч заявіў, што Расея «гатовая дапамагчы» Беларусі пры пагрозе сувэрэнітэту.
- 15 сакавіка, раніца. МЗС Беларусі параіў Бабічу «праявіць крыху павагі», «паглыбіцца ў спэцыфіку краіны знаходжаньня, пазнаёміцца зь яе гісторыяй і праявіць крыху павагі».
- 15 сакавіка, дзень. Бабіч назваў «балбатнёй» пазыцыю беларускага МЗС.
- 15 сакавіка, вечар. Крэмль раскрытыкаваў заяву МЗС Беларусі: «Мы маем права разьлічваць на больш паважлівае стаўленьне да амбасадара».
- 15 сакавіка, вечар: Старшыня Савету Рэспублікі Нацыянальнага сходу Беларусі Міхаіл Мясьніковіч у парлямэнце заявіў, што любыя крокі ў інтэграцыйных аб’яднаньнях «павінны прадпрымацца пры захаваньні сувэрэнітэту, незалежнасьці, тэрытарыяльнай цэласнасьці, Канстытуцыі і іншых атрыбутаў дзяржаўнасьці».
- 16 сакавіка ананімны карыстальнік сайту Petitions.by апубілкаваў зварот з заклікам абвясьціць Бабіча пэрсонай нон грата. Пэтыцыя сабрала тысячу подпісаў за два дні.
- 18 сакавіка Бабіч даў прэс-канфэрэнцыю з нагоды «пяцігодзьдзя ўваходжаньня Крыму ў склад Расейскай Фэдэрацыі». Шэраг незалежных СМІ абвясьціў, што ня пойдзе туды, каб чытачы не падумалі, што яны падтрымліваюць «адну з пазыцый па падзеях у Крыме ў 2014 годзе». Некаторыя прадстаўнікі дзяржаўных выданьняў там былі, але нічога не пыталі.
- 30 красавіка Бабіча адклікалі з пасады Амбасадара Расеі ў Беларусі. Новым амбасадарам стане Дзьмітры Мезенцаў.
