У Злучаных Штатах 28 ліпеня падчас гастранамічнага фэсту «Гілройскае сьвята часнаку» ў Каліфорніі пачалася страляніна, СМІ паведамляюць пра сама меней траіх загінулых і 12 параненых.
Дэпутат гарадзкой рады гораду Гілрой, дзе праходзіў фэст, сказаў, што гэта толькі папярэднія зьвесткі. Паводле іх, дваіх сур'ёзна параненых забралі зь мясцовай лякарні ў буйны мэдыцынскі цэнтар, чакалі дастаўкі яшчэ трох. Таксама на месцы здарэньня знаходзяцца супрацоўнікі спэцслужбаў ЗША.
Відавочцы публікуюць у сацсетках відэа, на якіх чуваць стрэлы і відаць, як разьбягаюцца людзі. Адзін зь відавочцаў паведаміў тэлеканалу NBC, што страляў белы чалавек ва ўзросьце каля 30 гадоў. Яшчэ адзін сьведка паведаміў агенцтву Reuters, што падчас страляніны людзі перакульвалі сталы і прабіваліся цераз плот, каб хутчэй уцячы.
