Пракуратура Нідэрляндаў абвінаваціла расейскія ўлады ў тым, што яны адмовіліся задаволіць запыт аб арышце і экстрадыцыі ў Нідэрлянды экс-камандзіра супрацьпаветранай абароны (СПА) самаабвешчанай «ДНР» Уладзіміра Цэмаха. Ён камандаваў СПА ў раёне гораду Сьнежнае летам 2014 году, калі быў зьбіты малайзійскі «Боінг» рэйсу MH-17 і лічыцца адным з галоўных сьведкаў у справе аб крушэньні лайнэра.
Супрацоўнікі ўкраінскіх спэцслужбаў у канцы чэрвеня 2019 году выкралі Цэмаха зь непадкантрольнай Кіеву тэрыторыі, пасьля чаго ён больш за два месяцы правёў у СІЗА ў Кіеве. Але потым ён быў абменены ў рамках «вялікага абмену» зьняволенымі паміж Расеяй і Ўкраінай у верасьні 2019 году. Пасьля абмену ён нейкі час правёў у Расеі, пасьля чаго зьехаў назад у «ДНР».
Адразу пасьля абмену нідэрляндзкія ўлады неадкладна запатрабавалі ад расейскіх уладаў арышту Цэмаха для экстрадыцыі ў Нідэрлянды. У дзень абмену 7 верасьня Нідэрлянды атрымалі ад Масквы пацьверджаньне, што запыт аб арышце Цэмаха быў атрыманы, але 19 лістапада 2019 году Дзяржаўная пракуратура Нідэрляндаў атрымала ад расейскіх уладаў апавяшчэньне, што арыштаваць Цэмаха немагчыма: ён паехаў у «ДНР» і адтуль ня можа быць выдадзены.
