У Берасьці на плошчы Леніна 8 сьнежня каля поўдня сабраліся праціўнікі будаўніцтва акумулятарнага завода, перадае БелаПАН. Такія сустрэчы праходзяць кожную нядзелю з 25 лютага 2018 года.
Удзельнікі сустрэчы абмяркоўвалі, як ідзе збор сродкаў для правядзеньня прафэсійнымі спэцыялістамі грамадзкай экалягічнай экспэртызы праекта акумулятарнага завода. Збор сродкаў арганізаваны на плятформе MolaMola. Усяго неабходна сабраць 9 тыс. рублёў, каб аплаціць працу спэцыялістаў.
Па дадзеных праваабаронцы Уладзіміра Вялічкіна, а 12.40 на плошчы было ня менш за 150 чалавек. Міліцыя ў мэгафон папярэджвала сабраных аб адказнасьці за ўдзел у несанкцыянаванай акцыі.
Як паведаміў Зьміцер Бекалюк, на сёньня сабрана прыкладна 3,7 тыс. рублёў. Ён нагадаў, што грамадзка-экалягічная экспэртыза ініцыяваная на самым высокім узроўні. Пра яе казаў Аляксандр Лукашэнка, калі прыяжджаў у Брэст у верасьні.
«Грамадзкая экалягічная экспэртыза будзе праводзіцца спэцыялістамі ў гэтай сфэры, і да іх думкі павінны прыслухацца», — лічыць Бекалюк. Дакумэнты па грамадзкай экалягічнай экспэртызе будуць накіраваныя ў Мінпрыроды.
Удзельнікі сёньняшняй сустрэчы на плошчы паведамілі, што завод у цяперашні час не працуе. З адміністрацыйных памяшканьняў нават пачалі вывозіць офісную мэблю. Але дзяжурствы каля завода працягваюцца. Яны таксама заявілі, што будуць прыходзіць на плошчу да таго часу, пакуль завод не будзе закрыты канчаткова.
Пасьля сустрэчы на плошчы праціўнікі будаўніцтва завода прайшлі па цэнтральных вуліцах Берасьця – Пушкінскай і Савецкай да кінатэатра «Беларусь».
Пратэсты супраць акумулятарнага заводу ў Берасьці. Што важна ведаць
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.
