МАЗ
Стала вядомае месца і час разьвітаньня з забітым у Менску дэманстрантам
Разьвітаньне з Аляксандрам Тарайкоўскім, які загінуў 10 жніўня падчас мірных пратэстаў на Пушкінскай, пройдзе а 12:00 у суботу, 15 жніўня, у рытуальнай залі на вуліцы Альшэўскага, 12. Пахаваюць яго на Заходніх могілках.
Берасьце. Машынабудаўнічае прадпрыемства „КОМПО“
«Выйшла 97% работнікаў, піша чытач».
У Магілёве пачалі выпускаць прастоўцаў. Некаторых зьбілі на горкі яблык
Вызваленыя паказваюць пабоі, нанесеныя ў аддзелах міліцыі пасьля затрыманьняў.
Сёньняшнія суды выносяць мінімальныя штрафы паводле часткі 1 артыкулу 23.34 Адміністрацыйнага кодэксу. Прысуды яны будуць абскарджваць, бо вінаватымі сябе ня лічаць.
Мэблевая фабрыка «Геас-ідэал» у Смалявіцкім раёне таксама выйшла на пратэст.
Сход на «Беларуськаліі»
Горадзенскі мясакамбінат 14 жніўня таксама зладзіў сход
У Літве хочуць зладзіць новы «Балтыйскі шлях» да мяжы зь Беларусьсю
Літоўскі тэлежурналіст Андрус Тапінас абвясьціў на Facebook пра пляны зладзіць новы «Балтыйскі шлях».
У 31-ю гадавіну славутай акцыі 1989 году тады яшчэ савецкіх Літвы, Латвіі і Эстоніі, 23 жніўня 2020 году, літоўцы зьбіраюцца выстраіцца ў жывы ланцуг ад Саборнай плошчы Вільні да мяжы зь Беларусьсю, каб выказаць салідарнасьць з суседзямі.
«Трэба паказаць нашым суседзям (беларусам), што Літва і Беларусь адзіныя ў сваёй барацьбе за свабоду, як гэта было яшчэ ў часы ВКЛ».
Аргкамітэт ужо пачаў працу, і на пачатку наступнага тыдня абвесьцяць набор валянтэраў для каардынацыі ўдзельнікаў.
«Няхай побач з нашымі трыкалёрамі ўзвышаецца чырвона-белы сьцяг Беларусі. Няхай Vytis (літоўская герб «Пагоня») зноў пакажа шлях да свабоды».
Як задакумэнтаваць выпадкі катаваньняў, каб прыцягнуць вінаватых да адказнасьці
Праваабарончы цэнтар «Вясна» і Сусьветная арганізацыя супраць катаваньняў пачалі кампанію дакумэнтаваньня выпадкаў жорсткага, бесчалавечнага і зьневажальнага абыходжаньня ў дачыненьні да ўдзельнікаў пратэставых выступленьняў.
«Аказваецца, міністру МУС можна сказаць „даруйце“, і ўсё?» Работнікі «Гродна Азот» сустрэліся з кіраўніцтвам гораду
Тысячы супрацоўнікаў «Гродна Азот» выйшлі, каб сустрэцца з кіраўніцтвам заводу і гораду. Яны дамагліся, каб сустрэча праходзіла па-за тэрыторыяй заводу і пусьцілі незалежную прэсу.
На сустрэчы было 3-4 тысячы чалавек.
Работнікі «Гродна Азот» патрабуюць:
- прызнаць выбары несумленнымі;
- вызваліць усіх палітзьняволеных і затрыманых падчас пратэстаў, а ня толькі работнікаў «Гродна Азот»;
- прыбраць з вуліц сілавікоў у балаклавах, каб яны адкрылі твары і насілі бэйджы з нагруднымі знакамі;
- прыбраць з вуліц вайсковыя машыны «Тыгры»;
- пакараць вінаватых сілавікоў у аварыі зь пяцігадовага дзяўчынкай;
- правесьці праверку затрыманьня і зьбіцьця горадзенскага журналіста Руслана Кулевіча.
«Учора міністар МУС сказаў „даруйце“, уяўляеце? Аказваецца, міністру МУС можна сказаць „даруйце“, і ўсё? Нам за парушэньні на вытворчасьці таксама можна сказаць проста „даруйце“ і не плаціць штрафаў?», — сказаў работнік «Азоту».
«Хто будзе плаціць штрафы, якія далі затрыманым?», — пыталіся людзі.
Пратэсты на МАПІДзе і Заводзе колавых цягачоў
Калёна жанчын на Нямізе, такая ж самая калёна ідзе па праспэкце Незалежнасьці
На Акрэсьціна вывесілі сьпісы затрыманых, але шмат хто не знаходзіць там сваіх блізкіх
Каля ізалятара на Акрэсьціна зьявіліся два сьпісы затрыманых, якія раніцай 14 жніўня паабяцаў падрыхтаваць намесьнік міністра ўнутраных справаў Аляксандар Барсукоў. Але людзей гэта не супакоіла: прозьвішчаў зусім мала, бальшыня сваякоў, якія сабраліся пад турэмнымі мурамі, па-ранейшаму ня маюць ніякіх зьвестак пра сваіх блізкіх. Многія хвалююцца, што яны настолькі моцна зьбітыя, што адміністрацыя не адважваецца іх паказаць.
Падпалкоўнік міліцыі ў запасе прыехаў развозіць людзей з Акрэсьціна
Падпалкоўнік міліцыі ў запасе Аляксандар Драневіч прыехаў, каб дапамагчы разьвесьці па дамах вызваленых з ізалятара на Акрэсьціна. Кажа, што ня можа спакойна назіраць, як катуюць ягоных суайчыньнікаў. Расказаў, што памятае па супольнай службе свайго калегу Аляксандра Барсукова яшчэ старшым лейтэнантам і капітанам, калі ратавалі пацярпелых у цісканіне на Нямізе. А цяпер яго не пазнаць: сыстэма «зламала і перамалола», зрабіла шрубкай злачыннага мэханізму. «Такога генацыду ўласнага народу сьвет даўно ўжо ня бачыў, — сказаў ён Свабодзе. — А генэралы кшталту Барсукова тыя злачынныя дзеяньні прыкрываюць. Перакананы, што абавязкова за гэта адкажуць»
Да турмы на Акрэсьціна прыйшоў намесьнік міністра ўнутраных спраў Аляксандар Барсукоў.
Яго шчыльна абступілі сваякі затрыманых і пачалі гучна патрабаваць, каб з «катавальні» неадкладна выпусьцілі ўсіх без выключэньня. На гэта міліцэйскі генэрал адказаў: «Выпусьцім, каго зможам. Фігуранты крымінальных справаў не ў маёй кампэтэнцыі».
Ён таксама паспрабаваў запэўніць, што «ніхто з вашых сваякоў там ня зьдзекуецца». Такія заявы вывелі прысутных зь сябе. Людзі абураныя, лаюцца матам і кажуць, што такім, як Барсукоў, і «ягоным падначаленым-садыстам», «ня месца ў праваахоўнай сыстэме».
«Прабачце нам». Настаўнікі выйшлі з пратэстам у цэнтар Менску
Лукашэнка: «Я пакуль жывы і не за мяжой»
Кіраўнік Беларусі Аляксандар Лукашэнка перакананы, што цяпер наўмысна спрабуюць «разгойдваць» дзяржаўныя прадпрыемствы.
Рада беларускай інтэлігенцыі прапанавала выйсьце з палітычнага крызісу
У цяперашняй сытуацыі процістаяньня ўлады і народу ў якасьці выйсьця бачыцца скліканьне круглага стала, на які запрашаюцца прадстаўнікі палітычных партый, грамадзкіх аб’яднаньняў і ўладных структураў. У выніку павінна быць выпрацаваная прававая аснова выхаду з палітычнага крызісу і правядзеньне выбараў новай легітымнай улады.
«…Нелігітымны кіраўнік схаваўся за сьпіной сілавых структураў і распачаў гвалт супраць уласнага народу. Сваімі дзеяньнямі ў фальсыфікацыі вынікаў галасаваньня і жорсткім разгоне мірных пратэстоўцаў улада цалкам страціла давер грамадзянаў. Яна ня мае ні маральнага, ні юрыдычнага права выступаць ад імя народу і прымаць любыя рашэньні на міжнародным узроўні. Менавіта народ быў і застаецца адзіным паўнамоцным суб’ектам улады. Мы ганарымся, што народ сваімі штодзённымі пратэставымі дзеяньнямі нагадвае ўсяму сьвету, хто ёсьць сапраўдным гаспадаром у нашым беларускім доме», — гаворыцца сярод іншага ў звароце.
Ціханоўская заклікала беларусаў бараніць свае галасы. Першая палітычная заява пасьля адʼезду. ВІДЭА
Сьвятлана Ціханоўская запісала відэазварот да беларусаў. Гэта першы палітычны выступ кандыдаткі ў прэзыдэнты пасьля вымушанага ад'езду зь Беларусі.
Яна залікала мэраў гарадоў арганізаваць 15 і 16 жніўня масавыя мірныя акцыі ў беларускіх гарадах.
«Там, дзе камісіі палічылі сумленна, мая падтрымка склала ад 60% да 70%, а ў Новай Баравой 90%. Беларусы больш ніколі не захочуць жыць з папярэдняй уладай. У яго перамогу большасьць ня верыць. Мы заўсёды казалі, што абараняць свой голас трэба законным і мірным спосабам. А выхад грамадзянаў на вуліцу ўлада ператварыла ў бойню. Сытуацыя крытычная».
Ціханоўская заклікала ўладу спыніць гвалт і падзякавала сілавікам, якія адмовіліся выконваць загады і не зьбівалі суграмадзян. Яна падзякавала рабочым, якія абвесьцілі страйк.
Сьвятлана Ціханоўская заклікала тых, хто галасаваў за яе на выбарах, падпісацца ў адмысловым фармуляры ў інтэрнэце.
Акторы Коласаўскага тэатру ў Віцебску запісалі відэазварот супраць гвалту