А 15.30 на МТЗ прыехаў прэм’ер-міністар Раман Галоўчанка
Пасьля таго, як адміністрацыя адмовілася пускаць на тэрыторыю заводу незалежную прэсу, рабочыя абсьвісталі кіраўніка ўраду і пад воклічы «Сыходзь» адмовіліся зь ім размаўляць. Першая зьмена, якая выйшла на пляцоўку перад прахадной, патрабуе, каб Галоўчанка выйшаў да іх. Крычаць «Жыве Беларусь!» і «Сьвета! Сьвета!» — такім чынам выказвабць падтрымку кандыдатцы ў прэзыдэнты Сьвятлане Ціханоўскай
«Пранікальнае раненьне ў грудзі, кулявыя раны вока». Што кажуць дактары пра пацярпелых ад сілавікоў
Лекар-хірург з 10-га клінічнага шпіталя расказаў Свабодзе пра пацыентаў, якія трапілі ў лякарню ў ноч з 10 на 11 жніўня.
«Я дзяжурыў у ноч з 10 на 11 жніўня. Мяне выклікалі на ўзмацненьне хірургічнай брыгады. За тую ноч да нас прывезьлі прыкладна 7-8 чалавек. Трох зь іх аглядаў я, усіх шпіталізаваў. У дваіх былі чэрапна-мазгавыя траўмы з ранамі галавы і мноства ўдараў мяккіх тканак па ўсім целе, сінякоў. Людзі апавядалі, што іх жорстка пабілі, каго на Рэвалюцыйнай, некага ў Серабранцы. Аднаго хлопца, зь ягоных словаў, наагул білі ў аўтазаку — з 19 вечара да 2 ночы. Ёсьць хлопец, у якога ўсё цела — суцэльная гематома.
Прывезьлі аднаго 20-гадовага хлопца, у якога была пранікальнае раненьне гумавай пуляй у грудную паражніну. І яго экстрэнна праапэравалі. Ён знаходзіцца ў шпіталі з бацькамі. Я бачыў чаргу ў афтальмалягічнае аддзяленьне, сядзелі людзі з кулявымі раненьнямі ў павека, вока».
«Аўганцы» патрабуюць пакараць міліцыянтаў за перавышэньне паўнамоцтваў
Вэтэраны баявых дзеяньняў у Аўганістане асудзілі беспрычынную жорсткасьць сілавікоў і запэўнілі, што ў выпадку неабходнасьці будуць абараняць беларускі народ.
«Мы — людзі, якія бачылі вайну на ўласныя вочы, а таму нам неабыякавы лёс нашай Радзімы, — гаворыцца ў звароце. — Хочам, каб усе ведалі: воіны-інтэрнацыяналісты — разам зь беларусамі. Усе мы — народ (не народзец) — выйшлі мірна на вуліцы, каб запатрабаваць сумленных выбараў! У адказ на гэта нашых дзяцей, братоў, сясьцёр саджаюць у турмы і зьбіваюць. Хто? Тыя, хто даваў прысягу абараняць. Менавіта абараняць, а не зьдзекавацца і прыніжаць. Браты „аўганцы“! Сёньня мы мусім заявіць, што былі, ёсьць і будзем разам са сваім народам».
Паводле былых афіцэраў, сяржантаў, салдатаў, якіх некалі прымусілі ваяваць за інтарэсы ўжо няіснай дзяржавы, сёньня маніпуляваць сабой яны не дазволяць.
Ціханоўская стварае Каардынацыйную раду для забесьпячэньня трансфэру ўлады
Сьвятлана Ціханоўская ў чарговым звароце пасьля ад’езду зь Беларусі заклікала ўлады да дыялёгу і абвясьціла, што яе штаб працягвае працаваць.
Кіраўніком штаба па-ранейшаму застаецца Марыя Мароз. Ціханоўская таксама пацьвердзіла паўнамоцтвы Вольгі Кавальковай і Мікалая Казлова як яе давераных асоб, якія будуць каардынаваць дзеяньне штаба ў Беларусі.
«З улікам таго, што адбываецца ў краіне і неабходнасьці прыняцьця неадкладных мер для аднаўленьня законнасьці ў Беларусі, я, Сьвятлана Ціханоўская, ініцыюю стварэньне Каардынацыйнай рады для забесьпячэньня трансфэру ўлады».
Паводле Ціханоўскай, у гэтую раду могуць увайсьці прадстаўнікі грамадзянскай супольнасьці.
«Сыходзь! Сыходзь!» Пратэст рабочых на МТЗ: стварылі страйкавы камітэт, чакаюць прэм’ер-міністра Галоўчанку
На пляцоўцы за прахадной Менскага трактарнага заводу (МТЗ) адбываецца мітынг рабочых. Паводле ацэнак карэспандэнта Свабоды, сабраліся 3-4 тысячы рабочых.
Адзін з удзельнікаў расказаў Свабодзе, што патрабаваньні да ўладаў традыцыйныя:
— Новыя сумленныя выбары без удзелу Аляксандра Лукашэнкі
— Неадкладнае вызваленьне палітзьняволеных і ахвяраў гвалту
— Рэфармаваньне сілавой сыстэмы з расфармаваньнем АМАП.
У Горадні работнікі мясакамбінату выйшлі на перамовы з кіраўніцтвам вобласьці
Сотні работнікаў мясакамбінату сабраліся на тэрыторыі прадпрыемства, каб абмеркаваць з кіраўніцтвам заводу і вобласьці пытаньне гвалту на вуліцах і вынікі выбараў. Прысутнічае намесьніца старшыні аблвыканкаму Зоя Кулеша, начальнік Ленінскага РАУС Алег Карпушкін, прадстаўнічка мясамалпраму.
Мітрапаліт Павал папрасіў прабачэньня за заўчаснае віншаваньне Лукашэнкі зь перамогай на выбарах
Як паведаміў Свабодзе прэсавы сакратар Беларускай праваслаўнай царквы айцец Сергій Лепін, мітрапаліт Павал папрасіў прабачэньня за заўчаснае віншаваньне Лукашэнкі, якое абурыла вернікаў.
«Мітрапаліт атрымаў інфарамцыю пра падзеі ў Беларусі, ён бачыў відэаролікі затрыманьняў, яны яго абурылі, жахнулі і засьмуцілі», — сказаў айцец Сергій Лепін.
Мітрапаліт адказаў на пытаньні вернікаў і заклікаў малітоўна падтрымліваць незаконна затрыманых і пакрыўджаных. Такая супольная малітва будзе адбывацца штодня а 13-й гадзіне і суправаджацца хрэсным ходам.
МУС: 2 тысячы затрыманых за пратэсты адпушчаныя дадому. У турмах застаецца яшчэ 5 тысяч
У МУС заклапочаныя праблемай перапоўненасьці месцаў утрыманьня затрыманых, спасылаецца БелТА на афіцыйную прадстаўніцу ведамства Вольгу Чамаданаву. Па яе словах, мінулыя суткі сталі самымі спакойным за апошнія чатыры дні. Акцыі насілі мірны характар, удзельнікі ланцугоў салідарнасьці ў сталіцы і шэрагу гарадоў гарадоў паказалі імкненьне да ўрэгуляваньня ўсіх пытаньняў негвалтоўнымі мэтадамі. Звыш 2 тысяч чалавек ужо адпушчаныя дадому, лёс іншых вырашаецца, дадала яна.
Лідэры палітычных партый і рухаў падпісалі дэкларацыю аб выхадзе з палітычнага крызісу
Прадстаўнікі дэмакратычных сілаў канстатавалі, што на прэзыдэнцкіх выбарах 9 жніўня перамогу атрымала Сьвятлана Ціханоўская. На гэтай падставе яны запатрабавалі неадкладнага сыходу ў адстаўку Аляксандра Лукашэнкі — як кандыдата, які не атрымаў падтрымкі народу Беларусі і ажыцьцявіў сілавы захоп і ўзурпацыю ўлады.
Таксама падпісанты патрабуюць неадкладнага вызваленьня ўсіх затрыманых удзельнікаў мірных акцый пратэстаў і палітвязьняў. Яны патрабуюць адстаўкі і арышту кіраўнікоў КДБ і КДК Валерыя Вакульчыка і Івана Тэртэля, кіраўнікоў МУС і АМАП Юрыя Караева і Юрыя Падабеда, чальцоў ЦВК на чале зь Лідзіяй Ярмошынай.
Падпісаліся: старшыня БСДП Ігар Барысаў, старшыня Партыі БНФ Рыгор Кастусёў, старшыня БКДП Аляксандар Ярашук, старшыня руху «За свабоду» Юрась Губарэвіч, старшыня ПСП Уладзімер Навасяд, сустаршыня БХД Віталь Рымашэўскі.
ЦВК: 80,1% за Лукашэнку, канчаткова
Цэнтральная выбарчая камісія Беларусі абвясьціла канчатковыя вынікі прэзыдэнцкіх выбараў. Прагаласавалі 5 818 956 чалавек, зь іх 2 806 640 датэрмінова.
Скаргі аб непрызнаньні выбараў ад Ціханоўскай, Канапацкай і Дзьмітрыева адхіленыя, ад Чэрачня нібыта «не паступала»: давераных асобаў не пусьцілі падаць скаргу ў ЦВК, яны выслалі яе поштай.
Галасы, паводле ЦВК, разьмеркаваліся так:
- Лукашэнка: 80,1% (4 661 075 чалавек);
- Ціханоўская: 10,1% (588 622 чалавека);
- Дзьмітрыеў: 1,2% (70 671 чалавек);
- Канапацкая: 1,67% (97 489 чалавек);
- Чэрачань: 1,14% (66 613 чалавек);
- супраць усіх: 4,59% (267 360 чалавек).
Менскі гарадзкі суд: 1063 чалавекі арыштаваныя за пратэсты
Менскі гарадзкі суд апублікаваў сьпіс арыштаваных падчас акцыяў пратэсту 11–12 жніўня ў Менску і тэрміны іх адміністрацыйных арыштаў. Сьпісы апублікавалі «ў сувязі са шматлікімі зваротамі грамадзян у суды гораду Менску».
У сьпісе арыштаваных у пятніцу 503 прозьвішчы. Учора суд апублікаваў сьпісы арыштаваных 11 жніўня. У гэтым сьпісе 560 прозьвішчаў. Тэрмін арышту — ад 7 да 25 содняў.
Праўладны прафсаюз энэргетыкаў патрабуе вызваліць затрыманых і расьсьледаваць фальсыфікацыі на выбарах
Праўладны прафсаюз энэргетыкаў, газавай і паліўнай прамысловасьці далучыўся да патрабаваньняў аб вызваленьні незаконна затрыманых удзельнікаў мірных акцый і выступіў супраць фальсыфікацый выбараў: «Мы зьвяртаемся да Генпракуратуры Беларусі з просьбай правесьці праверку на выбарчых участках, на якіх грамадзяне выявілі парушэньні пры падліку галасоў». Прадстаўнікі праўладнага прафсаюзу просяць кіраўніцтва дзяржаўных энэргетычных і паліўных прадпрыемстваў не прымяняць дысцыплінарныя спагнаньні і не звальняць супрацоўнікаў, якія ўдзельнічалі ў мірных акцыях пратэсту.
Мітрапаліт Павел папрасіў прабачэньня за заўчаснае віншаваньне Лукашэнкі зь перамогай на выбарах
Сотні людзей з кветкамі і сьцягамі каля цырку ў Менску проста цяпер. Стыхійныя шэсьці па ўсім праспэкце Незалежнасьці
Няма ў Беларусі ніякага расейскага спэцназу – мяркуе аналітык Свабоды Юры Дракахруст
Падобныя чуткі луналі ва Ўкраіне падчас і першага, і другога Майданаў. Хаця ва ўкраінскіх рэвалюцыях быў выразны геапалітычны складнік. Але яго і там, як высьветлілася пазьней, тады не было. З чаго яму зьяўляцца цяпер у Беларусі? Расейскі спэцназ — не таксі, якое прыяжджае на выклік кліента.
Ён не зьявіўся ў Кіргізстане ў 2010 годзе, калі народ зрынаў Курманбэка Бакіева. Тады, дарэчы, менавіта Лукашэнка прапаноўваў увесьці ў Кіргізстан войскі АДКБ. Масква адмовілася.
Кіргіская рэвалюцыя не была ані супраць Расеі, ані за эўрапейскі шлях. Гэтак жа, як і цяперашняя беларуская рэвалюцыя. Зьверствы на Акрэсьціна і ў Жодзіне, пра якія цяпер вядома ўсяму сьвету, ня самы лепшы кантэкст для ўзброенага ўмяшальніцтва на баку начальніка гэтых садыстаў і катаў.
Тым больш, што ў беларускай турме дагэтуль сядзяць затрыманыя «вагнэраўцы». Можа і зь імі гэтак жа абыходзяцца?
Гэта ня значыць, што Крэмль — белы і пухнаты і што расейскі спэцназ ня можа некуды прыляцець. Але не ў Беларусь зараз — лічыць аналітык Свабоды Юры Дракахруст.
Супрацоўнікі заводу «Агат» на праспэкце Незалежнасьці ў Менску
Горадзенскі камнеапрацоўчы завод — за сумленныя выбары
Бел-чырвона-белы сьцяг на кране ў Новай Баравой