Пра сваё рашэньне намесьнік дырэктара Нацыянальнага кадастравага агенцтва Дзьмітры Рытвінскі паведаміў у Facebook.
«Працу заўсёды можна знайсьці, а вось сумленьне, калі страціш, можна ўжо і не знайсьці. Звольніўся. Уласнае рашэньне. Калі хто яшчэ не чытаў, ніжэй спасылка. Дадаць нешта да таго, што ў лісьце, ужо складана. Можа, пазьней напішу пост даўжэй. Трэба асэнсаваць і перажыць момант трохі. Цяпер афіцыйна беспрацоўны, упершыню за 18 гадоў», — напісаў Рытвінскі ў Facebook.
19 верасьня палова калектыву агенцтва — больш за 80 чалавек, падпісалі адкрыты ліст. У ім яны патрабуюць спыніць жорсткасьць і празьмернае ўжываньне сілы з боку праваахоўных органаў і расьсьледаваць усе выпадкі перавышэньня службовых паўнамоцтваў і незаконнага выкарыстаньня сілы супраць мірных грамадзянаў. Таксама ў лісьце патрабуюць вызваленьня ўсіх палітычных зьняволеных, спыненьня адключэньня інтэрнэту і правядзеньня новых прэзыдэнцкіх выбараў з удзелам усіх альтэрнатыўных кандыдатаў з пад наглядам міжнародных незалежных назіральнікаў і беларускай грамадзкасьці.
У выпадку невыкананьня гэтых патрабаваньняў і адсутнасьці рэакцыі на іх супрацоўнікі Агенцтва пакідаюць за сабой права абвясьціць страйк.
