Лукашэнка пра Купалаўскі тэатар: будзе поўная свабода і рынкавыя адносіны
Аляксанадр Лукашэнка, размаўляючы з працоўным калектывам агракамбіната «Дзяржынскі», выказаўся аб сытуацыі вакол Купалаўскага тэатра, паведамляе БелТА.
«Цяпер яны спрабуюць напісаць нейкія заявы. А я думаю: яны хацелі свабоды, у іх лёзунг быў „Свабода. Рынак“. Я ім зараз прадстаўлю (і прадставіў ужо) поўную свабоду. Ёсьць калектыў, заяўляйце ў Амэрыку, што прывязеце туды спэктакль, едзьце туды і стаўце спэктакль. Вам заплацяць даляр — падзяліце, заплацяць тысячу даляраў — тысячу падзяліце. Ня прымуць вас — ну, гэта ж рынак. Зьезьдзіце ў Расею, пастаўце спэктакль. То бок, поўная свабода, лётайце, стаўце спэктаклі. Мы не будзем у гэта ўмешвацца. І рынкавыя адносіны: колькі зарабілі, столькі і атрымаеце», — выказаўся Лукашэнка.
Ён дадаў, што дзяржава датуе сфэру культуры, у тым ліку тэатральныя калектывы, але цяпер будзе «поўная свабода і рынкавыя адносіны». «Што хацелі, то і арганізуем ім», — дадаў ён.
Пуцін абмеркаў сытуацыю ў Беларусі з Саветам бясьпекі
Прэзыдэнт Расеі Ўладзімір Пуцін 21 жніўня правёў нараду з Саветам бясьпекі, абмеркавалі сытуацыю ў Беларусі, паведамляе афіцыйны сайт Крамлю.
Пуцін «грунтоўна праінфармаваў удзельнікаў нарады аб сэрыі тэлефонных міжнародных кантактаў, якія адбыліся на гэтым тыдні. Акцэнтаваная непрымальнасьць якога заўгодна ўмяшаньня звонку ў справы рэспублікі і безальтэрнатыўнасьць урэгуляваньня ўсіх ўнутрыбеларускіх праблемаў кіраўніцтвам гэтай краіны ў дыялёгу зь яе грамадзянамі».
Ці лічыцца недапушчальным умяшаньнем запрашэньне на БТ тэлевізійнікаў з Расеі, не ўдакладняецца.
У Беларусі афіцыйна заблякавалі онлайн-плятформы альтэрнатыўнага падліку галасоў і дзясяткі проксі-сэрвісаў
У Беларусі абмежавалі доступ да онлайн-плятформаў «Голас» і Zubr.in, паведамляе Tut.by са спасылкай на афіцыйны сайт БелДІЭ.
Сайты гэтых онлайн-ініцыятыў патрапілі ў сьпіс рэсурсаў абмежаванага доступу «на падставе рашэньня Міністэрства інфармацыі Рэспублікі Беларусь» 21 жніўня. Сьпіс з такімі рэсурсамі недаступны для прагляду звычайнымі карыстальнікамі, але даступны для інтэрнэт- і хостынг-правайдэраў. У адным з іх нам пацьвердзілі гэтую інфармацыю.
Акрамя таго, у сьпіс абмежаванага доступу паводле рашэньня Міністэрства інфармацыі ўнесьлі некалькі дзясяткаў проксі-сэрвісаў, з дапамогай якіх падчас адсутнасьці доступу да інтэрнэту 9-11 жніўня некаторыя карыстальнікі ажыцьцяўлялі доступ да папулярных мэсэнджэраў.
«Вынікі выбараў ЦВК узяў з паветра». Стваральнік плятформы «Голас» упершыню назваў сваё імя
20 жніўня «Голас» разам з ініцыятывай «Честные люди» апублікавалі прамежкавыя вынікі альтэрнатыўнага падліку галасоў. Зь іх можна зрабіць выснову, што Аляксандар Лукашэнка ня мог набраць 80%, як палічыла ЦВК на чале зь Лідзіяй Ярмошынай.
Лукашэнка: запрошаных расейскіх журналістаў аплочвае Расея
Аляксандар Лукашэнка сёньня, размаўляючы з работнікамі агракамбінату «Дзяржынскі», пракамэнтаваў прыезд у Белтэлерадыёкампанію журналістаў з Расеі, паведамляе БЕЛТА.
Лукашэнка растлумачыў, што запрасіў расейскіх журналістаў пасьля таго, як некаторыя з супрацоўнікаў тэлекампаніі, «якіх ён на руках насіў», «выскачылі на вуліцы і пачалі мітынгаваць». Лукашэнка зазначыў, што тых, хто захацелі сысьці, не ўгаворвалі застацца: «Што толку, што ты яго сёньня ўтрымаў, угаварыў, а ён усё роўна будзе кукіш у кішэні насіць».
У той жа час, паводле Лукашэнкі, ён гатовы прыняць журналістаў назад: «Я папрасіў расейцаў: дайце нам 2-3 групы журналістаў на ўсялякі выпадак. Гэта 6 або 9 чалавек з самага прасунутага тэлебачаньня, – сказаў Аляксандр Лукашэнка. – І наша моладзь хай паглядзіць, як працуюць. Слухайце, гэтыя яшчэ 2-3 групы не прыехалі, а палова тых, якія посьціліся і бегалі вакол Белтэлерадыёкампаніі, – назад. Я кажу: ну добра, сёньня возьмем назад. Хто заўтра сыдзе – не прымаем».
Ён заявіў, што запрасіў адну групу расейскіх журналістаў у прэзыдэнцкі пул. Пры гэтым расейскім журналістам нібыта Беларусь грошы ня плаціць, а фінансуюць іх з Расеі:
«Мы расіянам ня плацім наогул. Слухайце, няўжо я для 6 або 9 чалавек не знайду ў Расеі сяброў, якія падтрымаюць гэтых людзей?»
Лукашэнка дадаў, што дастаткова спэцыялістаў у гэтай сфэры, у тым ліку ў суседніх краінах, і іх пры неабходнасьці можна прыцягнуць на працу.
Лукашэнка заявіў, што супраць Беларусі дзейнічаюць некалькі замежных цэнтраў сіл
Супраць Беларусі дзейнічаюць некалькі цэнтраў сіл, дзе аселі «ўрады ў выгнаньні». Аб гэтым Аляксандр Лукашэнка заявіў 21 жніўня, наведваючы агракамбінат «Дзяржынскі», паведамляе БелТА.
«Каардынацыйная рада — гэта прыгожая назва. За мяжой сёньня, па-мойму, ужо пяць урадаў у выгнаньні», — адзначыў Лукашэнка.
Адным з такіх цэнтраў сіл кіраўнік Беларусі назваў Валера Цапкалу, які цяпер у Варшаве. «І ён сьмелы, робіць заявы з Варшавы. Вось гэта адзін з „урадаў“», — цытуе Лукашэнку БелТА.
Лукашэнка таксама сказаў, што Сьвятлана Ціханоўская выехала за мяжу «не безь яго ўдзелу». «Па яе просьбе. Яна нармальная жанчына, любіць сваіх дзяцей. Але яе кінулі на папялішча, і яна сёньня топчацца на гэтых галавешках. Яе аблыталі, ахуталі Міністэрства замежных спраў (Літвы. — БелТА), спэцслужбы, яна ўжо пачала рабіць заявы. Вось яшчэ адзін цэнтар. Я проста не хачу пералічваць — яны ад Амэрыкі да Варшавы», — адзначыў ён.
«Вы можаце мяне асуджаць ці не асуджаць, але пакуль я прэзыдэнт, я буду праводзіць жорсткую палітыку на стабілізацыю абстаноўкі ўнутры краіны», — сказаў Лукашэнка рабочым агракамбінату.
Акцыя салідарнасьці ў Ерусаліме
За выкананьне злачыннага загаду — крымінальная адказнасьць. Артыкул 40 КК РБ
Ці будуць пакараныя службовыя асобы, які выдавалі злачынныя загады жорстка затрымліваць людзей, катаваць і зьдзекавацца зь іх у пастарунках? Ці адкажуць тыя, хто выконваў злачынныя загады? Адвакат Дзьмітры Гарачка мяркуе, што гэта магчыма.
Паводле арт. 40 Крымінальнага кодэксу Беларусі, асоба, якая зьдзейсьніла наўмыснае злачынства, падпарадкаваўшыся загаду, нясе за гэта крымінальную адказнасьць на агульных падставах. Адмова ад выкананьня злачыннага загаду не караецца крымінальнай адказнасьцю. Першы пункт арт. 40 кажа, што крымінальную адказнасьць за прычыненьне шкоды нясе той, хто выдаў незаконны загад:
«Не зьяўляецца злачынствам прычыненьне шкоды інтарэсам, якія ахоўвае гэты Кодэкс, асобаю, якая дзейнічае, выконваючы абавязковы для яе загад ці распараджэньне, выдадзеныя ўстаноўленым чынам. Крымінальную адказнасьць за прычыненьне такой шкоды нясе асоба, якая выдала незаконны загад ці распараджэньне».
Даказаць, што загад быў у вуснай форме, цяжка, але магчыма, кажа адвакат Дзьмітры Гарачка. Далей чытайце па спасылцы.
Геаграфія выбараў: У якіх пратэставых гарадах незалежны падлік галасоў выявіў найбольшую анамалію
Свабода ўважліва праглядзела вынікі незалежнага падліку галасоў ад плятформаў «Голас», zubr.in і ініцыятывы «Честные люди».
Дзякуючы сумеснай працы платформаў «Голас», zubr.in і «Честные люди» ўдалося атрымаць і апрацаваць выніковыя пратаколы з 1310 выбарчых участкаў сярод 5767 па ўсёй Беларусі. У афіцыйных пратаколах 1 875 998 выбарнікаў, што складае 32,2% ад 5 818 955 тых, хто прагаласаваў.
У тых 1310 выніковых пратаколах, якія атрымалі ініцыятывы, Сьвятлана Ціханоўская набрала 81% галасоў. Але дадзеныя Цэнтравыбаркаму зусім іншыя, паводле іх 80% набраў Аляксандар Лукашэнка па ўсёй краіне. Глядзім, дзе зьвесткі разышліся найбольш.
Жабінка
На ўчастку для галасаваньня № 7, а гэта Жабінкаўскі цукровы завод, паводле ЦВК Аляксандар Лукашэнка перамог і набраў 880 галасоў. Але на плятформу «Голас» не прыйшоў ніводны сфатаграфаваны бюлетэнь за яго і ніводны голас. За Сьвятлану Ціханоўскую прыйшло 146 галасоў і 76 сфатаграфаваных бюлетэняў. Паводле камісіі, у яе толькі 72 галасы.
У якіх яшчэ гарадах афіцыйныя падлікі найбольш разышліся з дадзенымі незалежнага падліку, падрабязна чытайце па спасылцы.
Затрымалі аднаго з «дыджэяў пераменаў»
21 жніўня зноў затрымалі Ўлада Сакалоўскага, аднаго з «дыджэяў пераменаў», якія 6 жніўня на афіцыйным мерапрыемстве ў Кіеўскім сквэры ў Менску песьню Цоя «Перемен», паведамляе Tut.by са спасылкай на ягонага адваката.
Ўладзіслаў Сакалоўскі і Кірыл Галанаў атрымалі за гэту акцыю 10 сутак арышту, якія правялі ў ізалятары на Акрэсьціна. Яны выйшлі на волю 16 жніўня.
«Па матывах сумленьня». Рапарт аб звальненьні падаў пракурорскі работнік з Менску
21 жніўня рапарт пра звальненьне падаў памочнік пракурора Першамайскага раёну Менску Яўген Бабак. «Зь меркаваньняў сумленьня. P.S. Перастаньце рабіць зь мяне героя», — напісаў пад пастом у Інстаграм з фатаздымкам рапарту аб звальненьні і пасьведчаньнем работніка пракуратуры.
Як высьветліла «Наша Ніва», Яўген Бабак да звальненьня спрабаваў завесьці крымінальную справу па факце зьбіцьця матацыклістаў людзьмі ў форме супарцоўнікаў ДАІ ў менскім мікрараёне Ўручча.
Майдан ці ўсё ж не? Як СМІ Беларусі, Расеі і Ўкраіны расказваюць пра падзеі
Тэлеканал «Настоящее время» (праект Радыё Свабода / Свабодная Эўропа) прааналізаваў, як мэдыя трох краін пішуць пра падзеі ў Беларусі.
- «Тое, што адбываецца ў апошнія дні ў Беларусі. Ці ёсьць шанец, што гэта ператворыцца ў нешта накшталт украінскага Майдану?» (Zaxid.net, Украіна)
- «Усе гэтыя сцэнары беларускія пісаліся на ўзор украінскіх падзеяў» («Россия 24», Расея).
- «Той жа сцэнар, які пракруцілі ва Ўкраіне тады, добра прасочваецца ўжо цяпер у нашай краіне» («Беларусь 1», Беларусь).
Беларусь (дзяржаўныя СМІ): спроба каляровай рэвалюцыі
У беларускіх СМІ вызначэньня «Майдан» унікаюць. Незалежныя мэдыя імкнуцца не падаграваць радыкалізацыі пратэсту, на дзяржаўных тэлеканалах проста баяцца прызнаць, што падобнае можа здарыцца ў краіне, — бо яшчэ шэсьць гадоў таму Аляксандр Лукашэнка заяўляў: такога, як ва Ўкраіне, ён ніколі не дапусціць. Таму, пэрыядычна ўспамінаючы прыклад суседзяў, на дзяржтэлеканалах гавораць пра каляровыя рэвалюцыі ў агульным (пра лялькаводаў, падбухторнікаў, мэтадычкі і сакральныя ахвяры).
- «Мы назіраем спробу пракруціць чарговы сцэнар каляровай рэвалюцыі на постсавецкай прасторы» («Беларусь 1», Беларусь).
- «Тэхналёгіі каляровых рэвалюцыяў» (АНТ, Беларусь).
- «У цяперашняй беларускай сытуацыі наўпрост замяшаныя вонкавыя сілы» («Беларусь 1», Беларусь).
- «Ёсьць праграма, ёсьць рэжысэры» (АНТ, Беларусь).
- «Пэўным сілам можа быць выгадна падбухторваць да страйку» (ОНТ, Беларусь).
- «Страйкі — гэта мэтад расхістаць ўладу ў Беларусі, гэта перш за ўсё. Гэта другі пункт мэтадычкі каляровых рэвалюцыяў» (СТВ, Беларусь).
- «На акцыях нас і нашых дзяцей выкарыстоўваюць як гарматнае мяса» (ОНТ, Беларусь).
Расея: зноў Майдан
Значна вальней з цэтлікам «Майдан» абыходзяцца на фэдэральных тэлеканалах Расеі. З самага пачатку вулічных пратэстаў кажуць пра дэжавю, пра агульныя сцэнары і славутыя заходнія мэтадычкі.
- «Усё выбухала, грукатала. Адчуваньне было, што знаходзісься на вуліцы Інстытуцкай або Грушэўскага ў Кіеве. Вядома, паралеляў з Майданам напрошваецца вельмі шмат» («Звезда», Расея).
- «Супраць праваахоўнікаў выкарыстоўваліся ну тыя ж самыя мэтады, як і на кіеўскім Майдане» («Россия 1», Расея).
- «Вось усё ідзе пакуль што паводле сцэнара кіеўскага Майдану. Усё абсалютна» (Першы канал, Расея).
- «Паводле абсалютна заходніх мэтадычак» («Россия 1», Расея).
- «Літаральна па мэтадычцы Джына Шарпа» («Звезда», Расея).
Украіна: падобна, але не Майдан
На падабенства пратэстаў зьвяртаюць увагу і ва Ўкраіне.
- «Людзі з пабітымі тварамі, ліецца кроў — як гэта было на Майдане, на вуліцы Грушэўскага» («Еспресо», Украіна).
- «Улады... звозяць бюджэтнікаў і арганізоўваюць пастановачныя акцыі ў падтрымку Лукашэнкі.... Гэта ў іх такі мясцовы анты-Майдан. Паралелі напрошваюцца самі сабой» (24 канал, Украіна).
- Вельмі падобна на Майдан, але ўсё-такі ня ён — прыходзяць да высновы большасьць мэдыя. Занадта ўжо адрозьніваюцца беларусы ад украінцаў.
- «Пастаянна гучыць параўнаньне з Майданам. Ну нельга. Мы настолькі розныя краіны. Зусім розныя» (5 канал, Украіна).
- «У чым розьніца паміж Украінай і Беларусьсю. У нас пратэсты — быў Майдан, а ў іх цяпер, у Беларусі, пратэсты перарасьлі ў страйкі. У нас страйкаў не было. Прынамсі гэта» («НАШ», Украіна).
- «Пытаньне ў тым, што менавіта лічыць Майданам. Калі казаць пра стварэньне нейкай нацыянальнай ідэі, пра пошук нацыянальнай ідэнтычнасьці, як гэта было ў нас, пра нейкі геапалітычны выбар у бок Эўропы, то, зразумела, гэта зусім іншая гісторыя» (Zaxid.net, Украіна).
У Гомлі затрымалі настаўніцу — выносіла сьмецьце і зьнікла
У Гомлі невядомыя, імаверна, міліцыянты, затрымалі настаўніцу Іну Барысенку. Паводле яе дачкі Тацяны, маці панесла на вуліцу сьмецьце і зьнікла.
«Гэта было недзе каля 13.30. Маці панесла сьмецьце, у хатнім адзеньні, і не вярнулася. Я чакала, думала, мо з суседзямі размаўляе. Але прайшло дваццаць хвілін — а яе няма. Я выйшла на вуліцу — нідзе нікога. Праз хвілін дваццаць маці патэлефанавала і сказала, што яна ў Цэнтральным РАУС», — сказала Тацяна.
Яна дадала, што маці хадзіла на акцыі пратэсту ў Менску і Гомлі і давала інтэрвію незалежным СМІ. Цяпер дачка стаіць пад РАУС, але міліцыянты адмаўляюцца даць ёй інфармацыю, што з маці і калі яна выйдзе.
Апошні нумар «Народнай волі» ня выйшаў з друку
Галоўны рэдактар газэты «Народная воля» Ёсіф Сярэдзіч абураны адмовай Беларускага дому друку аддрукаваць апошнія нумары ягонай газэты і «Комсомольскай правды в Беларуси», прысьвечаныя палітычнаму крызісу ў Беларусі, міліцэйскаму гвалту і мітынгам праціўнікаў Аляксандра Лукашэнкі. Фармальна ў Беларускім доме друку прычынай нявыхаду газэт называюць паломку друкарскага абсталяваньня.
«Да нас масава зьвяртаюцца чытачы, пытаюць, як можна прачытаць сьвежы нумар, бо друкарні адмовілася яго друкаваць і ён ня трапіў у шапікі і падпісчыкам — фармальна з тэхнічнай прычыны. Вядома, мы абураныя гэтай сытуацыяй, але ў кожным разе газэта знойдзе дарогу да чытачоў», — сказаў Ёсіф Сярэдзіч Свабодзе.
А пакуль што апошні, 66-ты нумар выданьня даступны ў інтэрнэт-архіве газэты ў фармаце ПДФ, паведаміў ён.
Энэргетыкі Горадні зьвярнуліся з пэтыцыяй да ўладаў
Калектыў «Гроднаэнэрга» зьвярнуўся да кіраўніцтва свайго прадпрыемства, гораду і вобласьці з пэтыцыяй, пад якой падпісаліся 668 чалавек. У звароце энэргетыкі паведамілі, што заклапочаныя сытуацыяй у Беларусі пасьля выбараў 9 жніўня і не прызнаюць вынікі выбараў. Яны патлумачылі, што ня могуць далучыцца да агульнанацыянальнага страйку, бо ад іхных рашэньняў залежыць функцыянаваньне сыстэмаў жыцьцезабесьпячэньня грамадзянаў і працы ўсіх галінаў гаспадаркі, але выказалі салідарнасьць з удзельнікамі мірных пратэстаў.
Энэргетыкі выклалі шэраг патрабаваньняў да ўладаў:
- правесьці новыя сумленныя выбары прэзыдэнта,
- спыніць гвалт і незаконныя затрыманьні ў дачыненьні да мірных грамадзянаў,
- вызваліць усіх незаконна затрыманых і палітвязьняў,
- пакараць тых, хто затрымліваў і біў зьняволеных.
Акторы Купалаўскага тэатру пацьвярджаюць намер звольніцца, калі ня выканаюць іх патрабаваньні
«Пазыцыя, якую заняў Купалаўскі тэатар, не зьмянілася. Мы пацьвярджаем свой намер сысьці з тэатру ў выпадку невыкананьня заяўленых патрабаваньняў», — акрэсьлілі Свабодзе сваю пазыцыю супрацоўнікі Купалаўскага тэатру.
Цяпер яны ня могуць падаць заявы аб звальненьні, бо не ва ўсіх ёсьць магчымасьць трапіць у будынак. «Мы адмаўляемся ад індывідуальных сустрэч зь дзейным выканаўцам абавязкаў дырэктара. Усе неабходныя пытаньні павінны вырашацца ў прысутнасьці ўсяго калектыву», — заяўляюць супрацоўнікі Купалаўскага.
Яны заявілі, што патрабуюць ад уладаў:
- Вызваліць усіх палітвязьняў і затрыманых падчас выбарчай кампаніі і мірных акцый, зьвязаных з ёй.
- Расьсьледаваць усе выпадкі гвалту над пратэстоўцамі і выпадковымі людзьмі. Завесьці крымінальныя справы ў дачыненьні да сілавікоў, якія злоўжывалі сваімі паўнамоцтвамі.
- Дапусьціць прадстаўнікоў СМІ, адвакатаў і мэдыкаў да тых, каго яшчэ ўтрымліваюць у ізалятарах.
- Спыніць ціск на супрацоўнікаў, якія ўдзельнічаюць у мірных акцыях пратэсту і выказваюць сваю грамадзянскую пазыцыю.
- Правесьці новыя выбары прэзыдэнта з новым складам ЦВК з допускам незалежных міжнародных і нацыянальных назіральнікаў.
«Ланцуг пакаяньня» ад Курапатаў да Акрэсьціна. УЖЫВУЮ
Увечары 21 жніўня ў Менску ад мэмарыялу ў Курапатах да турмы на Акрэсьціна людзі становяцца ў «ланцуг пакаяньня». Свабода вядзе жывую трансьляцыю.
Людзі плянуюць стаць ад урочышча Курапаты праз вуліцы Мірашнічэнкі, Кальцова, плошчу Бангалор, Нямігу, мэтро «Грушаўка» да турмы на завулку Акрэсьціна.
18.20 Дзяўчына ў Курапатах згадвае сталінскія рэпрэсіі, падабенства іх зь сёньняшнімі падзеямі ў Беларусі. Называе зьбіцьцё і арышты людзей за выказваньне сваёй думкі незаконнымі.
18.30 Абаронца Курапатаў і ўдзельніца «Курапацкай варты» Ганна Шапуцька кажа, што ўдзельнічала ў акцыях з 2006 году. У 2020 годзе ўлады фактычна стварылі ўмовы, пры якіх могуць адбывацца новыя катаваньні. У наш час, у цэнтры Эўропы. Зьбіцьці, згвалтаваньні, сьмерці — ці было падобнае ў сталінскія часы? Хто ты такі, Лукашэнка, што маеш права забіраць нашыя жыцьці? Ён парушае ўсё, ён жыве «по понятиям». Гэта злачынца і тыран, які мусіць пайсьці пад трыбунал разам з сваімі служкамі. Беларусь ніколі ня будзе такой, як раней.
Яна кажа, што не разумела выбарчую кампанію, не падтрымлівала кандыдата, але «калі здарылася гэтая бойня, кожны зь беларусаў ня мае права маўчаць».
18.25 Мужчына кажа, што за 55 гадоў не адчуваў такога эмацыйнага ўдару. Кажа, што пакаленьне 20-гадовых выявілася сьмелымі хлопцамі і дзяўчатамі, якія ня будуць жыць пры камунізьме. Далей чытайце па спасылцы.
«Лукашэнка выкарыстоўвае для ўтрыманьня ўлады фашысцкія мэтады», — партыя «Справядлівы сьвет» зьвярнулася да Расеі
Беларуская партыя левых «Справядлівы сьвет» выступіла са зваротам да органаў дзяржаўнай улады, партый, грамадзкіх аб’яднаньняў, грамадзян Расеі.
Нягледзячы на тое, што пратэсты ў Беларусі маюць унутраныя прычыны, з вуснаў некаторых расейскіх палітыкаў і шэрагу СМІ яны тэндэнцыйна трактуюцца як «антырасейскія». Пры гэтым менавіта Аляксандар Лукашэнка ўжо працяглы час наносіць адчувальны ўрон двухбаковым адносінам». У гэтай сытуацыі «Справядлівы сьвет» зьвяртаецца з заклікам да органаў дзяржаўнай улады, палітычных партый, грамадзкіх аб’яднаньняў і грамадзянаў Расейскай Фэдэрацыі:
- Падтрымаць беларускі народ у яго патрабаваньнях адстаўкі Лукашэнкі, які выкарыстоўвае для ўтрыманьня ўлады «фашысцкія мэтады»
- Асудзіць дзеяньні беларускіх уладаў, якія дапускаюць грубы гвалт у дачыненьні да ўдзельнікаў мірных пратэстаў і простых грамадзянаў
- Запатрабаваць выпусьціць усіх затрыманых і палітычных зьняволеных і спыніць перасьлед паводле палітычных матываў
- Садзейнічаць кансалідацыі намаганьняў грамадзян, палітычных і грамадзкіх арганізацый дзьвюх краін, якія выступаюць за разьвіцьцё суседзкіх адносінаў паміж народамі Беларусі і Расеі. Падрабязна чытайце па спасылцы.
«Ланцуг пакаяньня» на Нямізе. Фота
Увечары 21 жніўня ў Менску ад мэмарыялу ў Курапатах да турмы на Акрэсьціна людзі становяцца ў «ланцуг пакаяньня»: ад урочышча Курапаты праз вуліцы Мірашнічэнкі, Кальцова, плошчу Бангалор, Нямігу, мэтро «Грушаўка» да турмы на завулку Акрэсьціна.
На фота — «ланцуг пакаяньня» ў раёне Нямігі. Карэспандэнт Свабоды кажа, што ланцуг цягнецца ад Гарадзкога Валу да вуліцы Багдановіча.
Мужчына на Нямізе кажа, што прыйшоў падтрымаць свабоду ў Беларусі. Называе зьбіцьцё людзей, іх зьнішчэньне генацыдам беларускага народу і фашызмам.
Перамовы: Эўразьвяз — за дыялёг у Беларусі, Расея вінаваціць краіны ЭЗ у правакаваньні канфрантацыі
Учора адбыліся перамовы паміж высокім прадстаўніком Эўразьвязу ў пытаньнях замежнай палітыкі і бясьпекі Жузэпам Бурэлем і міністрам замежных справаў Расеі Сяргеем Лаўровым.Адной з тэмаў была сытуацыя ў Беларусі пасьля прэзыдэнцкіх выбараў 9 жніўня.
Жузэп Бурэль паўтарыў, што Эўразьвяз ня лічыць гэтыя выбары ані свабоднымі, ані справядлівымі і таму не прызнае іх вынікаў. Ён заявіў пра неабходнасьць правесьці ў Беларусі нацыянальны інклюзіўны дыялёг, які прывядзе да канструктыўнага і мірнага вырашэньня крызісу. Усякага нэгатыўнага вонкавага ўмяшаньня неабходна пазьбягаць — падкрэсьліў высокі прадстаўнік ЭЗ. Ён паведаміў, што ЭЗ гатовы зрабіць свой унёсак у наладжваньне мірнага і канструктыўнага дыялёгу ў Беларусі.
З свайго боку кіраўнік МЗС Расеі Сяргей Лаўроў заклікаў высокага прадстаўніка ЭЗ у замежнай палітыцы і палітыцы бясьпекі прыняць меры, каб пэўныя краіны ЭЗ не правакавалі канфрантацыю паміж уладамі і апазыцыяй Беларусі. Цалкам чытайце па спасылцы.
Ад імя Ціханоўскай у Вярхоўны суд падалі скаргу аб непрызнаньні прэзыдэнцкіх выбараў
Адвакат Максім Знак, які прадстаўляе інтарэсы экс-кандыдаткі ў прэзыдэнты Беларусі Сьвятланы Ціханоўскай, падаў у Вярхоўны суд скаргу аб прызнаньні выбараў 9 жніўня несапраўднымі. Рашэньне аб пачатку вядзеньня будзе агучана цягам трох дзён, удакладніў ён.
Напярэдадні экс-кандыдатка ў прэзыдэнты Ганна Канапацкая таксама падала ў Вярхоўны суд скаргу на прызнаньне несапраўднымі выбараў прэзыдэнта.