Павал Латушка патлумачыў, чаму выехаў у Польшчу
Павал Латушка паведаміў Свабодзе пра свой выезд у Польшчу 2 верасьня:
«Я з раніцы знаходжуся ў Польшы на запрашэньне арганізатараў эканамічнага форуму ў Крыніцы Гурскай. Я неаднойчы браў удзел у гэтым форуме як амбасадар Беларусі. Падчас форуму пляную расказаць аб палітычнай і эканамічнай сытуацыі ў Беларусі.
У мяне заплянаваныя таксама сустрэчы ва ўрадзе, парлямэнце і МЗС Польшчы. Яшчэ я паеду ў Вільню, дзе буду мець сустрэчы ў МЗС і парлямэнце Літвы, каб паінфармаваць аб сытуацыі ў Беларусі пасьля выбараў».
Латушка паведаміў, што ён перасек мяжу ў Бераставіцы на машыне і зьбіраецца вярнуцца пасьля заканчэньня праграмы форуму і сваіх сустрэч.
Эканамічны форум у Крыніцы Гурскай — штогадовы форум, які называюць польскім Давосам. Сёлета ён праходзіць з 8 па 10 верасьня.
Макей прыгразіў краінам Балтыі «асымэтрычнымі санкцыямі». Сьпіс гатовы, але публікаваць яго ня будуць
Афіцыйны Менск адкажа Літве, Латвіі і Эстоніі «асымэтрычнымі санкцыямі», заявіў міністар замежных спраў Беларусі Уладзімер Макей на прэс-канфэрэнцыі ў Маскве.
«Яны хочуць быць наперадзе плянэты ўсёй, — абурыўся Макей. — Пытаньні выкарыстаньня падобных інструмэнтаў мы раней абмяркоўвалі і сыходзіліся ў тым, што санкцыі — абсалютна непрымальны спосаб міждзяржаўных стасункаў. І мне было дзіўна, што ўжо на другі дзень пасьля выбараў сталі чуцца галасы, што трэба ўводзіць санкцыі. Каб рэальна ацаніць сытуацыю, патрэбен час».
Паводле кіраўніка замежнапалітычнага ведамства, беларускі бок таксама правёў міжведамаснае ўзгадненьне, падрыхтаваў і зацьвердзіў свае сьпісы. Праўда, удакладніў, што публікаваць яго МЗС Беларусі ня мае намеру.
«Бог ім судзьдзя. Нам вядома пра санкцыйны сьпіс. Будзем даваць адэкватны адказ, — прыгразіў Макей. — Гэта найперш тыя асобы, якія заўзята спрабавалі ўмешвацца ў справы беларускай дзяржавы, уносілі прапановы аб фінансавай падтрымцы апанэнтаў».
У Маскве Ўладзімер Макей правёў перамовы з кіраўніком МЗС Расеі Сяргеем Лаўровым. Ён расказаў, што Беларусь пасьпяхова стрымала спробы «каляровай рэвалюцыі звонку».
Больш за 1000 супрацоўнікаў мазырскага НПЗ заклікалі да адстаўкі Лукашэнкі і Ярмошынай
Нязгодныя з вынікамі выбараў і абураныя жорсткасьцю сілавікоў работнікі ААТ «Мазырскі НПЗ» напісалі калектыўны ліст у адрас кіраўніцтва завода. Яны патрабуюць іх пачуць і адкрыта абмеркаваць падзеі апошніх тыдняў у краіне. Пад лістом падпісалася амаль 1186 чалавек, паведамляе Tut.by.
Работнікі выступаюць за адстаўку Аляксандра Лукашэнкі і Лідзіі Ярмошынай, за правядзеньне новых выбараў, асуджаюць гвалт з боку сілавікоў у дачыненьні да мірных грамадзянам і патрабуюць сумленнага расьсьледаваньня ўсіх выпадкаў гвалту з прыцягненьнем да адказнасьці ўсіх вінаватых.
Таксама рабочыя патрабуюць падачы дэпутацкіх запытаў па фактах затрыманьня працаўнікоў завода сілавымі структурамі і растлумачыць абгрунтаванасьць затрыманьня актывіста суполкі «Краіна для жыцьця», работніка ААТ «Мазырскі НПЗ» Руслана Парфёнава.
Падпісанты работнікі акцэнтуюць увагу на тым, што ня могуць далучыцца да агульнанацыянальнай забастоўкі, бо ня хочуць рызыкаваць эканамічнай стабільнасьцю прадпрыемства.
Ліцэй БДУ асудзіў гвалт на менскіх вуліцах. ЗАЯВА
У заяве «рашуча асуджаюць эскаляцыю гвалту на вуліцах Беларусі, якая назіраецца ў апошнія тыдні»:
«1 верасьня 2020 году выпускнікі Ліцэя БДУ сабраліся на мірную акцыю салідарнасьці ў падтрымку затрыманых выпускнікоў Антона Бяленскага і Андрэя Пазьняка, якая адбывалася насупраць галоўнага ўваходу ў Ліцэй БДУ. Акцыя скончылася жорсткімі затрыманьнямі з прымяненьнем сілы на тэрыторыі ўстановы адукацыі.
Нагадваем, што згодна з ч.1 арт. 33 Канстытуцыі Рэспублікі Беларусь кожнаму грамадзяніну гарантуецца свабода поглядаў, перакананьняў і іх свабоднае выказваньне. Згодна з арт 35. Канстытуцыі Рэспублікі Беларусь свабода сходаў, мітынгаў, вулічных шэсьцяў, дэманстрацый і пікетаваньня, якія не парушаюць правапарадак і правы іншых грамадзян Рэспублікі Беларусь, гарантуецца дзяржавай.
Супрацоўнікі Ліцэю БДУ асуджаюць усе формы агрэсіі і гвалту, тым больш на тэрыторыі ўстановы адукацыі, бо Ліцэй заўжды быў прыкладам спакойнага і паважлівага стаўленьня ня толькі да сваіх вучняў, настаўнікаў і выпускнікоў, але і да ўсіх суграмадзян, якія мірна выяўляюць сваё меркаваньне»
Жанчыны сабраліся ля стэлы ў Менску, каб адзначыць перамогу на фашызмам
Каля стэлы «Менск — горад-герой» праходзіць акцыя жанчын пад назвай «Дзень перамогі над фашызмам».
Гэты дзень гістарычны: 2 верасьня 1945 году капітуляцыю ў Другой сусьветнай вайне абвясьціла Японія — апошні з гітлераўскіх саюзьнікаў.
Міліцыянты папярэджваюць, што мерапрыемства несанкцыянаванае, і пагражаюць прававымі наступствамі.
«Увечары страшна выйсьці з дому. Карнікі ў чорным катуюць людзей, заганяюць мірных жыхароў у храм і замыкаюць дзьверы. Кожны беларус зь дзяцінства ведае, як гэта называецца. Фашызм. Нашы бабулі адолелі фашыстаў. Яны ваявалі і партызанілі, стаялі ля станка, лячылі параненых і гадавалі дзяцей. Дзякуючы ім беларусы выжылі як народ і захавалі свае каштоўнасьці: чалавечнасьць і годнасьць. Мы таксама пераможам! Таму цудоўныя беларускія дзяўчаты зноў выходзяць на вуліцы!», — гаворыцца ў паведамленьні ініцыятывы Girl Power Belarus.
Аднаго зь лідэраў магілёўскіх пратэстаў арыштавалі на 20 сутак
Прычына — нібыта дробнае хуліганства і непадпарадкаваньне службовай асобе.
1 верасьня ён прыйшоў на лінейку ў 43-ю магілёўскую школу і заклікаў пэдагогаў, якія працавалі ў выбарчых камісіях, прызнаць факты фальсыфікацыі выбараў ды «пакаяцца, стаўшы на калені». Актывіст зьвяртаўся да «45 пэдагогаў гэтай школы, якія працавалі ў трох участковых камісіях, што месьціліся ў навучальнай установе».
Валадара Цурпанава затрымалі прысутныя на ўрачыстасьці міліцыянты і даставілі ў Кастрычніцкі аддзел міліцыі. Да суду яго трымалі ў ізалятары. У камэнтары абласной міліцыі дзеяньні актывіста назвалі спробай «сарваць урачыстую лінейку».
Судзьдзя Тацяна Міхайлава пазбавіла абвінавачанага права ўдзельнічаць у працэсе праз онлайн-трансьляцыю, бо ён быў супраць таго, каб працэс вёўся на расейскай мове, і патрабаваў перакладчыка
Пачаліся суды над журналістамі. Справы вяртаюць на дапрацоўку
Першымі ў судзе Кастрычніцкага раёну разглядалі справы журналістаў Tut.by Надзеі Калінінай і Аляксея Суднікава. Паводле рашэньня судзьдзі Рудэнка, матэрыялы спраў гэтых журналістаў вярнулі на дапрацоўку. Пры гэтым у РАУСе журналістаў маюць права ўтрымліваць яшчэ 72 гадзіны.
Справы іншых чатырох затрыманых журналістаў пакуль не разгледжаныя.
Затрыманыя 1 верасьня журналісты Tut.by, Kp.by і агенцтва БелаПАН правялі ноч у Кастрычніцкім РУУС. На ўсіх былі складзеныя пратаколы за ўдзел у несанкцыянаванай акцыі. Па гэтым артыкуле прадугледжана пакараньне ў выглядзе штрафу або адміністрацыйнага арышту.
Сярод затрыманых карэспандэнты партала Tut.by Надзея Калініна і Аляксей Суднікаў, журналісты «Камсамольскай праўды ў Беларусі» Сяргей Шчагалёў, Мікіта Дубаленка і Марыя Эляшэвіч, а таксама фатограф агенцтва БелаПАН Андрэй Шаўлюга.
Рэпарцёраў затрымалі каля 17.00 у раёне стадыёна «Дынама» і даставілі ў РУУС Кастрычніцкага раёна, як ім было заяўлена, «для праверкі дакумэнтаў». Рэпарцёры, нагадаем, пазначаныя сінімі камізэлькамі з надпісам Прэса (менавіта так, загалоўнымі літарамі) на сьпіне. Акрамя таго, у іх маюцца бэйджы з фота і назвай выданьня, якое яны прадстаўляюць. Журналісты выконвалі прафэсійныя абавязкі і асьвятлялі студэнцкую акцыю пратэсту, якая праходзіла ў Менску.
Квасьнеўскі: Саша, ты каля фінішнай рысы...
Экс-прэзыдэнт Польшчы Аляксандар Квасьнеўскі даў інтэрвію ВВС, у якім распавёў пра свае сустрэчы з Лукашэнкам і ацаніў пэрспэктывы цяперашняга кіраўніка Беларусі.
Калектыў Горадзенскага мясакамбінату заклікаў да новых выбараў і прыгразіў забастоўкай
Калектыў Горадзенскага мясакамбінату накіраваў зварот у Палату прадстаўнікоў, Генпракуратуру і Горадзенскі абласны савет дэпутатаў. Работнікі выставілі шэраг патрабаваньняў, у тым ліку, новыя выбары, спыненьне гвалту і пакараньне вінаватых у гвалце і фальсыфікацыях. Пад зваротам пакінулі подпісы 853 супрацоўнікі мясакамбінату.
У сваім лісьце яны адзначылі, што выбары 9 жніўня прайшлі з парушэньнямі, што выклікала пратэсты па ўсёй краіне.
Патрабаваньні калектыву Горадзенскага мясакамбінату:
- выконваць заканадаўства Беларусі;
- прызнаць выбары 9 жніўня несапраўднымі, правесьці новыя адкрытыя выбары з празрыстым падлікам галасоў, прысутнасьцю незалежных назіральнікаў;
- адстаўка Аляксандра Лукашэнкі праз страту даверу, главы ЦВК Лідзіі Ярмошынай, главы МУС Юрыя Караева;
- спыніць гвалт у дачыненьні да грамадзян Беларусі;
- расьсьледаваць усе выпадкі, калі людзей незаконна затрымлівалі і білі, і пакараць вінаватых;
- пакараць вінаватых у фальсыфікацыях падчас выбараў.
Дэпутаты Эўрапарлямэнту ад Польшчы заклікалі да пэрсанальных санкцый супраць Лукашэнкі
Дэпутаты сышліся ў меркаваньні, што эўрапейская супольнасьць не павінна адмаўляцца ад беларускага пытаньня, а таксама фінансавай і эканамічнай падтрымкі.
Падчас дыскусіі таксама абмяркоўвалася тэма санкцый супраць прадстаўнікоў беларускага рэжыму. Палякі сыходзяцца ў меркаваньні, што Аляксандар Лукашэнка абавязкова павінен быць у чорным сьпісе Эўразьвязу.
ЦВК: Ярмошына ў Менску, але камэнтароў пра падзеі ў Беларусі не дае
Лідзія Ярмошына знаходзіцца ў Менску на працоўным месцы, заявілі Свабодзе ў Цэнтральнай выбарчай камісіі Беларусі.
Яе сакратарка адмовілася наўпрост злучыць карэспандэнта Свабоды зь Ярмошынай па службовым тэлефоне, але схадзіла да яе ў кабінэт на хвіліну, каб перапытаць, ці не пагадзілася б яна пракамэнтаваць для Свабоды апошнія падзеі ў Беларусі, выкліканыя выбарамі 9 жніўня.
Сакратарка вярнулася ад Ярмошынай і сказала, што тая не дае камэнтароў на гэтую тэму. Пры гэтым яна абвергла зьвесткі, што Ярмошына нібыта выехала ў Расею, у Калінінград.
Адмова Лаўрова сустракацца зь беларускай апазыцыяй выводзіць Каардынацыйную Раду за межы перамоўнага працэсу
Піша аглядальнік Свабоды Сяргей Навумчык
Як паведаміў «Коммерсантъ», міністар замежных справаў Расеі Сяргей Лаўроў пасьля сустрэчы з кіраўніком беларускага МЗС Уладзімерам Макеем заявіў, што расейскае кіраўніцтва не плянуе сустрэчы зь беларускай апазыцыяй — «спачатку ёй трэба стварыць структуру, сфармаваную ў адпаведнасьці зь беларускім заканадаўствам».
Безумоўна, маецца на ўвазе Каардынацыйная Рада, паколькі існыя партыі зарэгістраваныя ў адпаведнасьці з заканадаўствам.
Такім чынам, Лаўроў, з аднаго боку, адрынае якія-небудзь кантакты з Радай, якая ўсклала на сябе функцыі перадачы ўлады, пры тым, што, як цяпер зразумела, Крэмль імкнецца кантраляваць падзеі ў Беларусі і не дапусьціць ніякіх перамоваў (тым болей перадачы ўлады) без свайго ўдзелу.
З другога боку, гэта падштурхоўвае Раду трансфармавацца ў прадугледжаную заканадаўствам арганізацыйную форму, што ўцягнула б яе ў доўгатэрміновую бюракратычную гульню і істотна аслабіла б сувязі з пратэстным рухам, лічыць аглядальнік Свабоды Сяргей Навумчык.
Фотакарэспандэнт БелаПАН Андрэй Шаўлюга на судзе ў Менску. Яго вінавацяць у тым, што падчас працы на акцыі пратэсту ён «удзельнічаў у несанкцыянаваным масавым мерапрыемстве»
Намесьнік дзяржаўнага сакратара ЗША: Нашы асноўныя патрабаваньні — неадкладна вызваліць затрыманых і спыніць гвалт супраць пратэстоўцаў
Намесьнік дзяржаўнага сакратара ЗША Стывэн Бігэн заклікаў вызваліць несправядліва затрыманых і спыніць гвалт, абмеркаваў ролю Расеі і ЗША ў вырашэньні канфлікту і выказаў захапленьне мужнасьцю беларусаў. Эксклюзіўнае інтэрвію вёў дырэктар Беларускай службы Радыё Свабода Аляксандар Лукашук.
Калёна жанчын на праспэкце Незалежнасьці ў Менску
З «Новага радыё» звольніўся вядоўца, які расказаў пра беларускія пратэсты казачнымі алегорыямі
Дзьмітры Лаўроў вёў эфіры на «Новым радыё», заснавальнік якога — Фэдэрацыя прафсаюзаў Беларусі, ляяльная Аляксандру Лукашэнку. Падчас уключэньня 25 жніўня ён у форме «казкі» расказаў пра акцыю салідарнасьці каля Міністэрства адукацыі.
«Думаю, на маё звальненьне больш паўплываў мой камэнтар Tut.by, чым гісторыя пра Хогвартс. Я расказаў пра негалосную цэнзуру, якой прасілі прытрымлівацца супрацоўнікаў нашага радыё ў асабістых сацсетках, — кажа ён. — Пасьля гэтага думка калегаў падзялілася. Падтрымка тых, хто мяне і раней падтрымліваў, засталася. Астатнія, як я зразумеў, сталі лічыць мяне здраднікам. Я вырашыў, што ня буду працягваць кантракт. Ён у мяне быў да 10 верасьня».
Надпіс «Не забудзем!» на месцы гібелі Тарайкоўскага ля мэтро «Пушкінская» засыпалі пяском
Менскія ўлады намагаюцца зьнішчыць народны мэмарыял памяці загінулага дэманстранта Аляксандра Тарайкоўскага каля станцыі мэтро «Пушкінская».
Камунальнікі пад покрывам ночы прыбіраюць кветкі і сьвечкі, якія прыносяць людзі на месца расстрэлу пратэстоўца. Але назаўтра пляцоўка зноў набывае звыклае аблічча, людзі прыносяць новыя кветкі.
У ноч на 2 верасьня камунальныя службы прыбралі ўсе кветкі, а частку ходнікаў яшчэ засыпалі пяском. Такім чынам яны схавалі напісаны фарбай надпіс «Не забудзем!». Здымак чытача ў сваім тэлеграм-канале публікуе «Наша Ніва».
Аляксандар Тарайкоўскі стаў першай ахвярай пратэстаў. Ён загінуў 10 жніўня на вуліцы Прытыцкага, дзе сілавікі брутальна разагналі ўдзельнікаў акцыі з выкарыстаньнем шумавых гранат і гумовых куль.
У МУС спачатку заяўлялі, што Тарайкоўскі хацеў кінуць выбуховае прыстасаваньне, але яно выбухнула ў яго ў руцэ. Аднак відавочцы і відэакадры пацьвярджаюць, што ў яго мэтанакіравана стрэлілі з калёны сілавікоў. Аляксандру было 34 гады, у яго засталася 3-гадовая дачка.
«Мае калегі маўчаць». У Жыткавічах пэдыятра з 35-гадовым стажам аштрафавалі за ланцуг салідарнасьці
У Жыткавічах суд аштрафаваў на 135 рублёў пэдыятра Ірыну Цішкоўскую, якая ўжо 35 гадоў лечыць жыткавіцкіх дзяцей у раённай паліклініцы. Яна ўдзельнічала ў «ланцугу салідарнасьці» 23 жніўня.
Судзьдзя Андрэй Багданік зачытаў міліцэйскі пратакол: «Цішкоўская парушыла парадак правядзеньня мітынгу — узяла ў ім удзел і выражала свой пратэст супраць дзейнай улады».
Лекарка патлумачыла, што не прызнае сябе вінаватай.
«Гуляла з сабачкам. Ішла паўз сквэр і бачыла там шмат людзей. Яны былі ўсхваляваныя. І я была ўсхваляваная падзеямі ў краіне і разумела, што не магу застацца ўбаку. Мы стаялі і эмацыйна абмяркоўвалі сытуацыю ў краіне. Мы абмяркоўвалі, што выбары былі сфальсыфікаваныя, што людзей жорстка зьбівалі. Мы ведалі маладога чалавека з Жыткавічаў, які моцна пацярпеў, і мы гэта абмяркоўвалі. Што мы можам у маленькім горадзе зьмяніць? Мы можам проста абмяркоўваць...», — патлумачыла Ірына Цішкоўская.
«Ці падтрымліваюць мяне калегі? Ну як сказаць.... Маўчаць. Маладыя можа трохі і падтрымліваюць, а старыя — не. Ці баюся звальненьня? А каму будзе горш, калі мяне звольняць? Хто будзе лячыць дзяцей? Не, не пагражала начальства. Яны ж ведаюць маю пазыцыю», — кажа Ірына.
«Гэта трызьненьне». МЗС Украіны абвергла заяву Лаўрова пра ўкраінскіх экстрэмістаў, нібыта накіраваных у Беларусь
Міністар замежных спраў Украіны Дзьмітро Кулеба абверг выказваньні кіраўніка МЗС Расеі Сяргея Лаўрова пра тое, што радыкальныя дзеяньні падчас дэманстрацыяў у Беларусі нібыта правакуюцца і фінансуюцца з тэрыторыі Ўкраіны.
Пра гэта паведамляе Інтэрфакс.
«Ня хочацца нават камэнтаваць гэтае трызьненьне. Але ў рамках барацьбы з расейскай дэзынфармацыяй літаральна пяць тэзісаў па тэме:
- 1. 200 украінскіх экстрэмістаў, якіх Украіна нібыта накіравала ў Беларусь для дэстабілізацыі сытуацыі, і лягеры па падрыхтоўцы экстрэмістаў ва Ўкраіне зьяўляюцца плодам хваравітай фантазіі тых, хто даў такія дадзеныя майму расейскаму калегу Сяргею Лаўрову.
- 2. Украіна не вяла, не вядзе і ня будзе весьці ніякай падрыўной дзейнасьці супраць Беларусі.
- 3. Расея, наадварот, заяўляе, што ўжо накіравала некаторых сваіх „спэцыялістаў“ у Беларусь і гатовая накіраваць іх яшчэ больш», — напісаў Кулеба на сваёй старонцы ў Фэйсбуку.
- 4. Спробы Расеі прадставіць сваіх «зялёных чалавечкаў» у Беларусі як украінскіх экстрэмістаў — «гэта танны і пройгрышны трук».
- 5. «Як кажа прыказка: «злодзей крычыць — трымайце злодзея», — падсумаваў Кулеба.
«Не магу сказаць, праз год, два ці паўтара». Макей аб працы над новай Канстытуцыяй
Працэс падрыхтоўкі рэформы Канстытуцыі ідзе, але тэрміны яго завяршэньня пакуль невядомыя, заявіў міністар замежных спраў Беларусі Ўладзімер Макей на прэс-канфэрэнцыі ў Маскве, піша БелаПАН.
«Што тычыцца канстытуцыйнай рэформы, не магу сказаць, што будуць адпаведныя папраўкі прынятыя праз год, два ці паўтара, — сказаў ён. — Працэс ідзе. Папярэднія як мінімум два варыянты дакладаліся кіраўніку дзяржавы. Створана рабочая група. Ідзе працэс падрыхтоўкі канкрэтных паправак у дзейную Канстытуцыю».
Макей адзначыў, што будзе праходзіць «грамадзкае абмеркаваньне» гэтых паправак з усімі катэгорыямі насельніцтва.
«Не выключаю, што будзе створаная нейкая структура, у рамках якой будуць абмяркоўвацца папраўкі ў Канстытуцыю. Перакананы, што ў найбліжэйшай будучыні вымалюецца і фармат, і тэрміны завяршэньня працэсу. Гэта самы аптымальны варыянт, не парушаючы заканадаўства, арганізаваць працоўны дыялёг, які прывядзе ў канчатковым выніку да стабілізацыі сытуацыі і дээскаляцыі працэсаў, якія, на жаль, сёньня адбываюцца».