Што галоўнае сказаў Лукашэнка ў інтэрвію расейскім журналістам? Што ён абяцаў Крамлю ў сэнсе інтэграцыі? Ці пакарае ён хаця б каго за катаваньні? Ці сапраўды яго прыхільнікаў будуць рэзаць, калі ён сыдзе?
Гэтыя тэмы ў Праскім акцэнце абмяркоўваюць аглядальнікі Свабоды Валер Карбалевіч, Сяргей Навумчык і Юры Дракахруст.
Карбалевіч: Падтрымка Лукашэнку з боку Расеі, Пуціна не безумоўная. Пакуль толькі Пуцін казаў, што пасьля канстытуцыйнай рэформы ў Беларусі пройдуць датэрміновыя парлямэнцкія і прэзыдэнцкія выбары, сёньня і Лукашэнка сказаў, што гэта ня выключана. Гэта вельмі няпэўная «морквачка».
З аднаго боку, гаворыцца пра выбары, а зь іншага, што калі ён пойдзе, то ўсіх яго прыхільнікаў перарэжуць.
Зь сёньняшніх заяваў Лукашэнкі я б ніякіх далёкасяжных высноваў не рабіў. Лукашэнка, калі ўтрымае ўладу, можа адмовіцца ад усіх цяперашніх абавязаньняў.
Навумчык: Мэта інтэрвію — максымальна засьведчыць сваю ляяльнасьць Крамлю, каб нэўтралізаваць раздражненьне расейцаў некаторымі яго ранейшымі крокамі і заявамі.
Цяжка сказаць, на каго ён разьлічвае, калі кажа, што яго апанэнты хочуць разарваць усе сувязі Беларусі з Расеяй.
Каардынацыйная рада нічога такога не казала. Марыя Калесьнікава ў інтэрвію Эхо Москвы станоўча прыгадвала саюзную дзяржаву.
Ці будзе Лукашэнка капітуляваць перад Масквой? Мне здаецца, што ён ужо капітуляваў.
