Падчас жаночага маршу 26 верасьня ў падземным пераходзе на плошчы Якуба Коласа ў Менску затрымалі музыкаў кавэр-гурту Best Sound Band. У міліцыю іх даставілі разам з інструмэнтамі.
Калі частка пратэстоўцаў спусьцілася ў пераход, пяцёрка заграла «Перемен» Віктара Цоя і «Муры». Людзі віталі маладых музыкаў, падпявалі ім. Але неўзабаве зьявіліся міліцыянты, якія загадалі спыніцца і зьбірацца ў аддзяленьне для «высьвятленьне асобаў».
Дазвольныя паперы на вулічныя выступы на міліцыянтаў не падзейнічалі. Таксама і абураныя воклічы мінакоў, якія спрабавалі прысароміць сілавікоў: маўляў, толькі і хапае імпэту, што змагацца з уласным народам.
Пазьней высьветлілася, што затрымалі трох удзельнікаў кавэр-бэнду: Яраслава Бандарчука, Ніну Матушкіну, Вадзіма Бурака. Да суду іх зьмясьцілі ў цэнтар ізаляцыі на Акрэсьціна, такія прозьвішчы ёсьць на сайце Праваабарончага цэнтру «Вясна». Яшчэ дваіх адпусьцілі.
У чым канкрэтна абвінавачваюць музыкаў, пакуль невядома. Але сама меней да панядзелка ім давядзецца правесьці за кратамі.
Гэта ня першыя музыкі, якія пацярпелі ад сілавікоў апошнім часам. 27 верасьня павінны выйсьці асуджаныя на 8 сутак сьпявак Аляксандар Памідораў і лідэр мэтал-калектыву Gods Tower Уладзіслаў Наважылаў. Таксама затрымлівалі да суду фронтмэна культавага трэш-гурту «Тарнада» Андрэя «Ангуса» Піпко.
