Прэзыдэнт ЗША Дональд Трамп адмовіўся ўдзельнічаць у перадвыбарчых онлайн-дэбатах са сваім супернікам дэмакратам Джо Байдэнам.
У інтэрвію тэлеканалу Fox Business Трамп адзначыў, што ня будзе марнаваць на гэта час. Прэзыдэнт таксама сказаў, што, на яго думку, ён перамог Байдэна на першых дэбатах і меў намер перамагчы на другіх.
Раней арганізатары дэбатаў паведамілі пра намер правесьці дэбаты ў віртуальным фармаце. Гледачы і мадэратар павінны былі знаходзіцца ў Маямі, а кандыдаты ў прэзыдэнты — онлайн.
2 кастрычніка стала вядома, што ў Дональда Трампа і яго жонкі дыягнаставаны каранавірус. Прэзыдэнта на некалькі дзён шпіталізавалі паводле рэкамэндацыі лекараў, ён працаваў дыстанцыйна. Цяпер, паводле слоў Трампа, ён адчувае сябе добра.
Джо Байдэн казаў, што гатовы да новай перадвыбарчай сустрэчы з Трампам, калі гэта будзе бясьпечна. Ён прапаноўваў перанесьці дэбаты на іншы дзень.
Праведзеныя на мінулым тыдні першыя дэбаты кандыдатаў у прэзыдэнты паміж Трампам і Байдэнам ператварыліся ў эмацыйную сварку.
Выбары прэзыдэнта ЗША прызначаныя на 3 лістапада.
