Выява герба «Пагоня» была такой жа, як у рэестры гісторыка-культурных каштоўнасьцяў, — паведаміла «Вясна».
Максім Лакаткоў жыве з жонкай і дзіцем на 6-м паверсе дома ў менскім мікрараёне Ржавец. У акне яны павесілі папяровую выяву «Пагоні».
25 лютага да іх уварваўся ГУБАЗіК і правёў ператрус.
Максіма Лакаткова затрымалі і 26 лютага прывезьлі ў суд Цэнтральнага раёну.
Судзьдзя Дзмітры Карсюк спытаўся, чаму Максім вырашыў абраць менавіта гэты сымбаль для разьмяшчэньня.
— Адчуваю сымпатыю.
— Для чаго разьмясьцілі менавіта на акне?
— Падабаецца, як сонечнае сьвятло праходзіць праз малюнак, гэта падымае мне настрой.
— Што менавіта падабаецца ў гэтым сымбалі?
— Мне падабаецца конь.
У выніку судзьдзя адправіў Максіма Лакаткова на 15 дзён арышту, палічыўшы «Пагоню» на акне несанкцыянаваным пікетаваньнем.
25 лютага разам з Максімам Лакатковым затрымалі і ягоную жонку Юлію Лакаткову. Яе абвінавацілі ў супраціве міліцыянтам на паркоўцы РУУС, куды яе прывезьлі пасьля ГУБАЗіКа, і ў той жа дзень аштрафавалі на 1160 рублёў. Таксама зьнялі «пакаяннае» відэа, у якім яна кажа, што дзялілася «неправеранай» інфармацыяй з «дэструктыўным» тэлеграм-каналам «Мотолько, помоги». Юлія Лакаткова — адна з ключавых асобаў у беларускай экасыстэме стартапаў. Яна кіруе некалькімі IT-бізнэсамі.
