Лінкі ўнівэрсальнага доступу

У «справе мэдыкаў» памілавалі Ігара Ласіцкага і Аляксандра Бялецкага, асуджаных за карупцыю

абноўлена

Аляксандар Бялецкі
Аляксандар Бялецкі

Днямі з папраўчай калёніі ў Віцебску вызвалілі асуджаных у «справе мэдыкаў» Ігара Ласіцкага і Аляксандра Бялецкага, паведаміў Tut.by.

Аляксандар Бялецкі — прафэсар, заслужаны дзяяч навукі, ляўрэат Дзяржаўнай прэміі, акадэмік. З 2007 году кіраваў беларускім Цэнтрам траўматалёгіі і артапэдыі.

Яго затрымалі 5 ліпеня 2018 году. КДБ знайшоў у яго каля 500 тысяч даляраў, але інкрымінавалі ў якасьці хабару толькі 7 тысяч.

У апошнім слове Бялецкі прызнаў віну ў тым, «што браў грошы, прымаючы іх за падарункі, і праявіў слабасьць, не вярнуўшы іх». Але пры гэтым казаў, што не даваў ніякіх абяцаньняў, не лабіяваў і не прасоўваў нечыя інтарэсы.

15 лютага 2019 году Менскі гарадзкі суд прызнаў навукоўца, акадэміка, ляўрэата Дзяржаўнай прэміі, былога дырэктара РНПЦ траўматалёгіі і артапэдыі Аляксандра Бялецкага вінаватым у атрыманьні хабараў і асудзіў на 7 з паловай гадоў калёніі ўзмоцненага рэжыму.

У сьнежні 2019 году суд пастанавіў вярнуць асуджанаму Бялецкаму канфіскаваныя грошы — больш за 550 тысяч рублёў.

Але ў лютым 2020 году пасьля пазову Генэральнай пракуратуры гэтыя грошы спагналі ў бюджэт. Як высьветліла «Народная воля», гэта зрабілі на падставе нормаў закону аб барацьбе з карупцыяй «у інтарэсах дзяржавы».

Ігар Ласіцкі падчас працэсу ў студзені 2019 году
Ігар Ласіцкі падчас працэсу ў студзені 2019 году

Былога намесьніка міністра аховы здароўя Ігара Ласіцкага таксама памілавалі, паведаміў Tut.by.

Ігара Ласіцкага затрымалі ў ліпені 2018 году, а ў лютым 2019 году пасадзілі на 6 гадоў за хабарніцтва.

Згодна з матэрыяламі справы, злачынная дзейнасьць былога намесьніка міністра аховы здароўя Ігара Ласіцкага пачалася ў жніўні 2015 году, калі ён атрымаў ад кіраўніка адной з прыватных фірмаў хабар у памеры 1500 даляраў.

У 2016 годзе Ігар Ласіцкі, паводле дзяржаўнага абвінаваўцы, атрымліваў хабар на сваім працоўным месцы ў Міністэрстве аховы здароўя. У лютым 2016 году Ласіцкі атрымаў 10 тысяч даляраў, у тым жа годзе быў яшчэ адзін эпізод з атрыманьнем 10 тысяч эўра.

Ва ўсіх выпадках прычынай атрыманьня хабару ад прадстаўнікоў прыватных кампаній, па словах пракурора, стала «спрыяньне ў вырашэньні пытаньняў, якія знаходзіліся ў ягонай кампэтэнцыі». Паводле матэрыялаў справы, у міністэрстве Ігар Ласіцкі быў куратарам закупак мэдычнай тэхнікі, а таксама ўваходзіў у склад камісій, якія вырашалі пытаньні аб рэгістрацыі замежнай тэхнікі ў Беларусі.

«Справа мэдыкаў». Што важна ведаць

Што здарылася. У чэрвені 2018 году стала вядома пра масавыя затрыманьні ў мэдыцынскай галіне. У дачыненьні да 37 службовых асобаў былі ужытыя розныя меры стрыманьня за злачынствы, прадугледжаныя трыма артыкуламі Крымінальнага кодэксу

  • 430 («Атрыманьне хабару»),
  • 431 («Даваньне хабару»)
  • 243 («Ухіленьне ад выплаты сумаў падаткаў і збораў»)

Усяго ў «справе мэдыкаў» фігуруюць звыш 90 чалавек. Усе яны, як сьцьвярджаюць у КДБ, неаднаразова атрымлівалі незаконныя грашовыя ўзнагароды за садзейнічаньне ў пастаўцы мэдабсталяваньня і мэдыцынскіх прэпаратаў па завышаных цэнах. Усім прыцягнутым да крымінальнай адказнасьці, за выключэньнем апошніх затрыманых, выстаўленыя абвінавачаньні паводле названых крымінальных артыкулаў.

Ілюстрацыйнае фота
Ілюстрацыйнае фота

  • 11 чэрвеня 2018 году стала вядома пра затрыманьне дырэктара Цэнтру экспэртыз аховы здароўя Аляксандра Сталярова, а таксама ягонага намесьніка (за стварэньне для «сваіх пастаўшчыкоў» прывабных умоў паставак імпартнага мэдычнага абсталяваньня ў дзяржаўныя шпіталі і паліклінікі).​
  • 18 чэрвеня «Ежедневник» паведаміў пра «масавыя затрыманьні ў структурах Мінздароўя» — больш за 10 чалавек — у межах апэрацыі аб пастаўках у беларускія мэдычныя ўстановы абсталяваньня па завышаных цэнах, паводле відавочна ашуканскіх схемаў. Сярод затрыманых аказаўся кіраўнік мэдыцынскай службы Міністэрства абароны Аляксей Яськоў.​
  • 19 чэрвеня МУС паведаміла пра затрыманьне галоўнага патолягаанатама Мінздароўя, кіраўніка гарадзкога клінічнага патолягаанатамічнага цэнтру Аркадзя Пучкова (за хабар цягам 10 год на суму каля 200 тысяч даляраў).​
  • 25 чэрвеня старшыня КДБ Валер Вакульчык паведаміў, што затрыманыя і ўзятыя пад варту 33 службовыя асобы, а ўсяго трапіла пад увагу больш за 50 чалавек. Фактычна ўсе яны віну прызналі і супрацоўнічаюць са сьледзтвам.
  • Паводле намесьніка генпракурора Беларусі Аляксея Стука, сфэра аховы здароўя лідзіруе па колькасьці карупцыйных злачынцаў: 114 за пяць месяцаў 2018 году.
  • 21 ліпеня быў звольнены затрыманы раней намесьнік міністра аховы здароўя Ігар Ласіцкі. Курыраваў пытаньні звароту мэдычных вырабаў у Беларусі і ліцэнзаваньня, за спрыяльнае вырашэньне пытаньняў, паводле КДБ, браў хабар «ад 2500 да 10 тысяч даляраў».
  • 21 жніўня агучаны першы вырак у справе мэдыкаў-карупцыянэраў: былы намесьнік галоўнага лекара па тэхніцы Менскай абласной дзіцячай клінічнай бальніцы Аркадзь Патапаў асуджаны да 6 гадоў пазбаўленьня волі ў калёніі ўзмоцненага рэжыму за карупцыйныя злачынствы.
  • 11 верасьня Аляксандар Лукашэнка заявіў, што па «справе мэдыкаў» распачатыя 95 крымінальных спраў, дзе фігуруюць «дзясяткі мільёнаў даляраў», амаль 100 чалавек трапілі пад сьледзтва.
  • 30 студзеня 2019 году стала вядома Камітэт дзяржаўнай бясьпекі вядзе папярэдняе сьледзтва па 4 крымінальных справах, у межах якіх 93 чалавекі маюць працэсуальныя статусы абвінавачаных і падазраваных: 30 службовых асобаў сыстэмы аховы здароўя і 63 асобы — уласьнікі (заснавальнікі), кіраўнікі і працаўнікі камэрцыйных структураў. У гэты час ужо ішоў шэраг судоў па карупцыйных справах у мэдыцыне.

«Ідзі і грабі». Былы высокапастаўлены чыноўнік Мінздароўя камэнтуе «справу мэдыкаў»

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG