Як паведамляе ТАСС, тэматыка Беларусі закраналася на саміце кіраўнікоў ЗША і Расеі ў Жэнэве «ў кантэксьце неабходнасьці ўлічваць каштоўнасьці і традыцыі розных краін». Пра гэта заявіў кіраўнік расейскага МЗС Сяргей Лаўроў на брыфінгу па выніках праведзенай у Маскве сустрэчы з міністрам замежных спраў Беларусі Ўладзімерам Макеем. Сяргей Лаўроў браў удзел у перамовах у Жэнэве ў складзе расейскай дэлегацыі.
Акрамя таго, ён адзначыў, што Масква і Менск занепакоеныя лініяй, якую ў адносінах да іх праводзіць Эўразьвяз. Паводле яго, такую палітыку нельга прызнаць канструктыўнай, калі фармулююцца ўстаноўкі кшталту «адпор, стрымліваньне і ўзаемадзеяньне». Усё гэта «нагадвае расслаеньне думкі і наўрад ці можа лічыцца разумнай пазыцыяй».
Падтрымаў Лаўрова і Ўладзімер Макей, які канстатаваў, што супраць Беларусі і Расеі вядзецца сапраўдная інфармацыйная вайна, існуюць адзіныя цэнтры яе вядзеньня.
«Апошнія падзеі наглядна дэманструюць наяўнасьць адзіных цэнтраў, стратэгіі і інструмэнтаў вядзеньня інфармацыйнай вайны супраць абедзьвюх краін. Для замежных нядобразычліўцаў мы даўно ўжо рэальная саюзная дзяржава ў разуменьні нашай супольнасьці і адзінства. Але мы выстаім. З улікам таго, што Беларусь не адна, шэраг саюзьнікаў і партнэраў гатовыя аказаць нам падтрымку, мы адназначна вытрымаем», — сказаў ён.
На выніковай прэс-канфэрэнцыі было зазначана, што саюзьнікі дамовіліся каардынаваць намаганьні для ўмацаваньня дзяржаўнага сувэрэнітэту дзьвюх краін.
«З улікам такой адкрыта агрэсіўнай лініі нашых калегаў мы дамовіліся каардынаваць намаганьні дзеля ўмацаваньня дзяржаўнага сувэрэнітэту Расеі і Беларусі і забясьпечваць нацыянальную бясьпеку нашых краін сумеснымі намаганьнямі на аснове наяўных міжнародна-прававых дамоўленасьцяў», — падсумаваў Сяргей Лаўроў.
Пры гэтым расейскі бок разьлічвае, што «канстытуцыйная рэформа», якая цяпер праходзіць у Беларусі, пакладзе канец спэкуляцыям вакол беларускай дзяржавы.
