У рэдакцыі ўдакладнілі, што хочуць засьцерагчы супрацоўнікаў выданьня і чытачоў у сувязі з пазовам аб прызнаньні матэрыялаў Tut.by экстрэмісцкімі ў Беларусі.
Выдаленьне пастоў і адзнакі вэрыфікацыі выклікала асьцярогі, што рэдакцыя Tut.by страціла доступ да сацыяльных сетак выданьня.
Каманда Tut.by запэўніла, што захоўвае доступ да каналу. «У нас ёсьць ўвесь архіў схаваных і выдаленых пастоў. Гэтая інфармацыя ня страчаная назаўсёды. Людзі, якія цяпер вядуць канал, знаходзяцца за мяжой, спробаў узлому не было», — гаворыцца ў паведамленьні.
У рэдакцыі Tut.by таксама патлумачылі выдаленьне пазнакі вэрыфікацыі з акаўнту каналу ў Telegram неабходнасьцю мець магчымасьць хутка перайменаваць яго ў выпадку прызнаньня экстрэмісцкім, каб засьцерагчы і аўтараў, і чытачоў. «Зрабіць гэта за пару хвілінаў пасьля рашэньня суду нельга, мы вырашылі падрыхтавацца загадзя», — адзначылі ў выданьні.
18 траўня сайт Tut.by быў заблякаваны, а рахункі кампаніі замарожаныя. Супраць кіраўнікоў Tut.by распачалі крымінальную справу аб нявыплаце падаткаў. У рамках яе затрымалі 15 чалавек, зьвязаных з выданьнем.
У сярэдзіне чэрвеня МУС Беларусі запатрабавала прызнаць экстрэмісцкімі матэрыялы Tut.by і сацыяльных сетак выданьня. 24 чэрвеня суд павінен быў вынесьці рашэньне, але разгляд пазову МУС быў прыпынены на нявызначаны тэрмін.
Tut.by і зьвязаныя зь ім рэсурсы — найбуйнейшы інтэрнэт-холдынг ў краіне. У сьнежні ў яго адклікалі ліцэнзію СМІ — з прычыны папярэджаньняў, атрыманых падчас асьвятленьня пратэстаў пасьля прэзыдэнцкіх выбараў 2020 году.
Пра перасьлед Tut.by
- 18 траўня офіс рэдакцыі быў заблякаваны за публікацыю «забароненай заканадаўствам інфармацыі», туды прыйшлі супрацоўнікі ДФР. Пазьней у ведамстве паведамілі, што на службовых асобаў завялі крымінальную справу за ўхіленьне ад выплаты падаткаў у асабліва буйным памеры. На думку сілавікоў, рэзыдэнт Парку высокіх тэхналёгій атрымаў выручку, не абумоўленую дзейнасьцю, дазволенай для рэзыдэнтаў.
- У справе затрымалі агулам 15 чалавек: кіраўнікі, журналісты і іншы пэрсанал мэдыйнага парталу Tut.by (Людміла Чэкіна, Марына Золатава, Вольга Лойка, Ірына Рыбалка, Алена Талкачова, Анжэла Асад, Марыя Новік, Ала Лапатка, Аляксандра Дайнека, Андрэй Аўдзееў, Дар'я Данілава, Кацярына Ткачэнка і Ірына Касьцючэнка), а таксама генэральны дырэктар Hoster.by Сяргей Павалішаў (вызвалілі 1 верасьня) і ўдава заснавальніка Tut.by Юлія Чарняўская. Праваабаронцы прызналі іх палітвязьнямі.
- Удава заснавальніка парталу Юрыя Зісера Юлія Чарняўская цяпер пад хатнім арыштам, два дні пасьля затрыманьня пра яе не было нічога вядома, яна перанесла гіпэртанічны крыз і была на нейкі час шпіталізаваная.
- Сам сайт Tut.by заблякаваны рашэньнем Мінінфармацыі.
- У сьнежні 2020 году Tut.by на патрабаваньне Міністэрства інфармацыі пазбавілі статусу СМІ. Падставай сталі раней вынесеныя папярэджаньні да матэрыялаў аб правядзеньні прэзыдэнцкіх выбараў, дзейнасьці Камітэту дзяржаўнага кантролю, беларускай мытні і г.д.
- Увечары 27 чэрвеня партал выдаліў з сацыяльных сетак усе допісы за апошнія паўтара года.
- 13 жніўня Суд Цэнтральнага раёну Менску прызнаў інфармацыйную прадукцыю і сацыяльныя сеткі Tut.by і новага праекту тутбаеўцаў Zerkalo.io экстрэмісцкімі.
- 7 кастрычніка Сьледчы камітэт паведаміў пра новую крымінальную справу супраць тутбаеўцаў — за распальваньне варожасьці, учыненае групай асобаў (ч. 3 арт. 130). Максымальная санкцыя па гэтым артыкуле — 12 гадоў зьняволеньня.
- Справу Tut.by пачалі разглядаць 9 студзеня 2023 ў Менскім гарадзкім судзе. Працэс праходзіў ў закрытым рэжыме, яго ўзначальвала судзьдзя — Валянціна Зянькевіч.
- На лаве падсудных знаходзіліся галоўная рэдактарка выданьня Марына Золатава, былая генэральная дырэктарка Людміла Чэкіна. Яшчэ тры фігуранткі справы, якім раней зьмянілі меру стрыманьня, – Вольга Лойка, Алена Талкачова і Кацярына Ткачэнка – на судзе не прысутнічалі, яны жывуць за мяжой.
- 17 сакавіка Марыне Золатавай і Людміле Чэкінай прысудзілі па 12 гадоў калёніі кожнай.
- 15 красавіка генэральны дырэктар Hoster.by Сяргей Павалішаў напісаў, што ўлады памілавалі дзевецярых фігурантаў справы пасьля пададзенага ў сьнежні прашэньня аб памілаваньні. Партал Zerkalo.io паведаміў, што мае інфармацыю аб тым, што агулам ад крымінальнай адказнасьці вызвалілі 9 чалавек.
