На дзяржаўным тэлеканале «Беларусь 1» паказалі фільм пад назвай «Неблагородное семейство». У ім расказвалі пра людзей, якіх вінавацяць у тым, што яны закідалі кактэйлямі Молатава дом дэпутата Алега Гайдукевіча.
Да выхаду фільму «Наша Ніва» пагаварыла са сваякамі затрыманай сям'і. У самім фільме БТ сям'ю зьвінавацілі, што яны рыхтавалі іншыя напады на прадстаўнікоў улады, а таксама паведамілі, што агулам па справе затрыманыя больш за 20 чалавек.
Пра напад на дом Гайдукевіча стала вядома ў чэрвені. Дэпутат паскардзіўся, што ў дом прыляцела некалькі бутэлек з гаручым рэчывам, будынак цудам не загарэўся. Неўзабаве КДБ завёў па гэтым факце крымінальную справу за тэрарызм. Сёньня дзяржаўная тэлевізія паказала затрыманых яшчэ да вынясеньня прысуду.
Як піша «Наша Ніва», Вольга і Віталь Вайцяховічы жылі ў Барысаве. 48-гадовая Вольга займалася нарошчваньнем пазногцяў. Яе 56-гадовы муж Віталь працаваў на вытворчасьці драўляных вокнаў. У іх трое дзяцей: дарослыя дачка і сын ужо ў шлюбах, жывуць асобна, малодшаму сыну, які жыў зь імі, — 9 гадоў.
Сын Улад скончыў Вайсковую акадэмію, пасьля жыў у Менску. Ажаніўся, дзяцей пакуль ня мае. Жонка Насьця працавала прадаўцом у краме зоатавараў. Уладу 26 гадоў, Насьці — 24.
«Улад вучыўся на нейкую спэцыяльнасьць, зьвязаную з унутранымі войскамі, пасьля акадэміі служыў у Менску. Я дакладна ня ведаю дзе, глядзеў за салдатамі, штосьці такое, — расказала «Нашай Ніве» сястра хлопца Хрысьціна. — Але пасьля выбараў Улад звольніўся адтуль. Ён казаў, што яму цяжка знаходзіцца ў той абстаноўцы, казаў, што маральна ня вытрываў. Цяпер працаваў звычайным таксістам».
Хрысьціна ўзгадвае пра затрыманьне родных.
«13 жніўня я спала дома. Мне пазванілі і сказалі, што маму затрымалі. Я спачатку нічога не зразумела. Разгубілася, нават ня стала нічога ўдакладняць. Пачала званіць тату, Уладу, жонцы Ўлада — ва ўсіх недасяжныя тэлефоны. Тады я спалохалася, зразумела, што нешта ня так».
Дзяўчына кажа, што ня ведае дакладна, у чым абвінавачваюць яе сям’ю.
«Адвакаты сказалі, што яны пад падпіскай аб неразгалошваньні, таму нельга нам казаць пра абвінавачаньні. Да нас даходзяць чуткі і меркаваньні, што там ці то тэрарызм, ці то замах на чалавека, але што канкрэтна, мы ня ведаем. Нам нічога ня кажуць».
