Прэм’ер-міністар Косава Альбін Курці заявіў, што яго часткова прызнаная дзяржава зацікаўлена ў дасягненьні пагадненьня з Сэрбіяй. Але пакуль ня будзе дасягнута пагадненьне, якое, па словах Курці, будзе міжнародным, «юрыдычна абавязковым», у Косаве будзе дзейнічаць поўная ўзаемнасьць, якая, па яго словах, будзе ўстанаўлівацца «паступова».
Са словаў Курці вынікае, што ў косаўскім урадзе ня надта задаволеныя цяперашнімі ўмовамі.
«Узаемнасьць у адносінах прадыктавана нашым сувэрэнітэтам. Мы ня можам не карыстацца сувэрэнітэтам, які мы дэкляравалі, гэтак жа як мы ня можам паводзіць сябе нэўтральна ў адносінах да саміх сябе або прымаць рашэньні, якія ствараюць дуалізм у нашай прававой сыстэме», — сказаў Курці падчас выступу перад Генэральнай радай партыі ўлады Vetëvendosje.
Курці сказаў, што нядаўнія рашэньні ў дачыненьні да сэрбскіх нумарных знакаў і дакумэнтаў былі ў рамках ажыцьцяўленьня сувэрэнітэту Косава. Пагадненьне азначае, што грамадзяне Сэрбіі і Косава змогуць перасякаць мяжу са сваімі пасьведчаньнямі асобы безь неабходнасьці дадатковага дакумэнту на ўезд-выезд. Сэрбія прымяняла такую практыку 11 гадоў, а Косава выдала такія дакумэнты за некалькі гадзін 1 жніўня.
Два рашэньні — адносна сэрбскіх нумарных знакаў і дакумэнтаў — узмацнілі напружанасьць паміж Косавам і Сэрбіяй, кульмінацыяй якой стала ўсталяваньне мясцовымі сэрбамі барыкад на поўначы Косава 31 ліпеня і 1 жніўня. Барыкады былі ліквідаваныя, а ўрад Косава паабяцаў адкласьці выкананьне рашэньняў.
Чакаецца, што 1 верасьня ўступіць у сілу пастанова ўрада Косава аб нумарных знаках. Гэта рашэньне заключаецца ў перарэгістрацыі аўтамабіляў на сэрбскіх нумарных знаках. Мяркуецца, што перарэгіструюць 10 000 нумарных знакаў з абрэвіятурамі гарадоў Косава — такімі як PZ, KM, PR, UR і падобнымі — якія цыркулююць на поўначы, населенай большасьцю сэрбамі.
Урад сьцьвярджаў, што грамадзяне будуць мець два месяцы, каб перарэгістраваць свае аўтамабілі з нумарамі RKS-Рэспубліка Косава. Сэрбія прапанавала, каб сэрбы на поўначы мелі аўтамабілі, абсталяваныя нумарнымі знакамі KS — якія маюць нэўтральны статус у адносінах да грамадзянства Косава — але Курці адхіліў гэтую прапанову.
