Інфармацыю аб пераходзе Купянску пад кантроль украінскіх вайскоўцаў таксама пацьвердзіла крыніца Радыё Свабода.
Гэта азначае, што ўзброеныя сілы Ўкраіны змогуць прадоўжыць контранаступ на левым беразе ракі Аскол.
Кіеў інфармацыю аб узяцьці Купянску пакуль не пракамэнтаваў.
Прэзыдэнт Расеі Ўладзімір Пуцін, выступаючы 16 верасьня на прэс-канфэрэнцыі ў Самаркандзе і гаворачы пра дзеяньні ўкраінскіх войскаў, адзначыў, што Масква бачыць «спробы правядзеньня тэрактаў» і адказвае на гэта стрымана, але адказ можа аказацца больш сур’ёзным. «Паглядзім, чым яно скончыцца, сьцяг у рукі», — сказаў Пуцін пра ўкраінскі контранаступ.
Акрамя таго, расейскі прэзыдэнт паведаміў, што плян «спэцапэрацыі» карэкціроўцы не падлягае, а асноўная мэта Масквы — вызваленьне Данбасу.
- На пачатку верасьня ў выніку контранаступу ўкраінская армія вызваліла Ізюм і дзясяткі іншых населеных пунктаў. Расейскія войскі пакінулі паўночныя раёны Харкаўскай вобласьці.
- Прадстаўнікі ўкраінскага кіраўніцтва заяўляюць, што цяпер не гатовыя да перамоваў з Расеяй. Іх мінімальнае патрабаваньне — вывад войскаў з усёй міжнародна прызнанай тэрыторыі Ўкраіны, уключаючы анэксаваны Крым.
- Расейскія патрабаваньні да Кіева не фармалізаваныя. Пуцін раней называў мэтамі апэрацыі прызнаньне Ўкраінай анэксіі Крыму, самаабвешчаных рэспублік Данбасу, а таксама «дэмілітарызацыю і дэнацыфікацыю».
