Даходы
1685 рублёў — такі сярэдні заробак склаўся ў Беларусі ў студзені гэтага году, падлічвае Белстат. У лідэрах застаецца Менск, дзе заробак на 37% вышэйшы, чым агулам у Беларусі, — 2309 рублёў.
Калі агулам па ўсіх абласьцях Беларусі за год заробак у рэальным вымярэньні (з папраўкай на рост цэнаў) вырас, то ў Менску ён зьнізіўся на 2,7%.
Па сфэрах дзейнасьці, паводле афіцыйных лічбаў, самы высокі заробак — у галіне інфармацыі і сувязі: 4653,2 рубля. Самы нізкі — у сфэры адміністратыўных і дапаможных паслуг: 1126,3 рубля.
Больш рэальную карціну паказвае статыстыка прыбыткаў хатніх гаспадарак. У такой гаспадарцы, то бок сям’і, можа быць як адзін чалавек, так і больш за трое. Сярэдні прыбытак у разьліку на адну гаспадарку ў мінулым годзе склаў 1863,8 рубля на месяц. Сярэднія выдаткі адной хатняй гаспадаркі — 1696 рублёў на месяц.
Выдаткі
Найбольш сродкаў, паводле дадзеных Белстату, беларусы выдаткоўваюць на харчаваньне — 39,3% усіх тратаў. На другім месцы — нехарчовыя тавары, то бок вопратка, тэхніка ды іншае: 34,4%. На паслугі беларусы трацяць 23,8%, а на жыльлёва-камунальныя паслугі — 6,4% усіх тратаў.
Гэтыя лічбы з году ў год у Беларусі прыкладна аднолькавыя. У 2021 годзе на харчаваньне беларусы трацілі 40,2% ад усіх расходаў, на нехарчовыя тавары — 33,6%, на паслугі — 23,7%.
Жыцьцё за рысай беднасьці
3,9% беларусаў маюць прыбытак, ніжэйшы за бюджэт пражытковага мінімуму — нормы, якую дзяржава лічыць дастатковай для мінімальных патрэб грамадзяніна на месяц. Цяпер гэты бюджэт складае 341 рубель на месяц. Гэта ў 5 разоў менш за сярэдні заробак. Людзей зь мінімальным даходам найбольш у Магілёўскай вобласьці — 5,9%, а найменш у Менску — 1,4%.
У гарадах 3,4% людзей маюць даход ніжэйшы за пражытковы мінімум, па вёсках такіх людзей больш — 5,8%.
Па зьвестках Белстату, у 2021 годзе ў Беларусі жылі 9,3 мільёна чалавек.
Атрымліваецца, за рысай беднасьці жывуць 362,8 тысячы чалавек. Гэта ўдвая больш, чым жыхароў невялікага гораду кшталту Баранавічаў.
