«Пятага студзеня мінулага году лідэры дзяржаў, якія валодаюць ядзернай зброяй, выступілі з сумеснай заявай, у якой гаварылася, што немагчыма выйграць або весьці ядзерную вайну. У заяве падкрэсьлівалася, што трэба пазьбягаць войнаў паміж дзяржавамі, якія валодаюць ядзернай зброяй, і зьніжаць стратэгічныя рызыкі», — сказала дыпляматка, адказваючы на просьбу пракамэнтаваць пазыцыю Кітаю адносна рашэньня Расеі разьмясьціць у Беларусі тактычную ядзерную зброю.
Мао Нін падкрэсьліла, што ў цяперашніх абставінах усе бакі «павінны засяродзіцца на дыпляматычных намаганьнях для мірнага ўрэгуляваньня ўкраінскага крызісу і працаваць разам, каб спрыяць разрадцы сытуацыі».
У сумеснай заяве, прынятай па выніках нядаўняй сустрэчы старшыні КНР Сі Цзіньпіна і прэзыдэнта Расеі Ўладзіміра Пуціна, ёсьць пункт: «Усе ядзерныя дзяржавы не павінны разьмяшчаць ядзерную зброю за межамі нацыянальных тэрыторый і павінны вывесьці ўсю разьмешчаную за мяжой ядзерную зброю».
