Сілавікі затрымалі Паўла Данкова aka Morgotika — стваральніка культавага менскага рэйв-праекту «Мара». Яго абвінавачваюць у ахвяраваньнях у фонды салідарнасьці і падпісках на «экстрэмісцкія» рэсурсы, піша Citydogby.
У Гомлі пачалі судзіць паводле пратэставых артыкулаў бармэна «Кватэрніка» Глеба Вятошкіна
Глеба Вятошкіна абвінавачваюць у распальваньні іншай сацыяльнай варожасьці (ч. 1 арт. 130 КК), а таксама па «народным» артыкуле 342, ч. 1 (арганізацыя і падрыхтоўка дзеяньняў, якія груба парушаюць грамадзкі парадак, альбо ўдзел у іх), паведамляе «Вясна».
У Докшыцах падчас уроку ў школе № 1 затрымалі настаўніцу Марыну Корду
«За лайкі», — напісаў у Facebook аб прычыне затрыманьня Марыны Корды грамадзкі актывіст і краязнаўца Кастусь Шыталь.
Таксама ён удакладніў, што разам зь ёй затрымалі і Вікенція Корду, былога фізрука школы №1, мужа Марыны Корды.
Улады заблякавалі доступ да выданьня «Інтэкс-прэс»
Пракурор Берасьцейскай вобласьці вынес пастанову аб абмежаваньні доступу да інтэрнэт-рэсурсу intex-press.by. На мінулым тыдні сайт і сацсеткі баранавіцкага выданьня былі прызнаныя «экстрэмісцкімі».
Падчас фэйкавай рассылкі ГУБАЗіК затрымаў стваральніка базы фота беларускіх будынкаў
Як вынікае з сюжэту АНТ, менскага інжынэра Ўладзімера Фішмана спрабуюць абвінаваціць у перасылцы архіўных здымкаў, якія ёсьць у адкрытым доступе, паведамляе «Наша Ніва».
Наколькі вядома, мужчыну затрымалі ці ўвечары 20 красавіка, ці ранкам 21-га.
Уладзімер цікавіцца гарадзкой забудовай і архітэктурай каля 20 год. Ён стварыў унікальную базу з тысячамі фатаздымкаў розных будынкаў у Беларусі і па-за яе межамі — photobuildings.com (раней domofoto.ru).
У відэа, якое паказалі на АНТ, Уладзімер расказвае, што нібыта зарэгістраваўся ў чаце пляну «Перамога», а ў лістападзе 2022 году зь ім нібыта зьвязаўся Аляксандар Азараў.
У кадры паказваецца скрын перапіскі ў вайбэры зь невядомым карыстальнікам, дзе той пытаецца пра час стварэньня старога кальца тралейбуснага маршруту № 57 у Менску. На гэта Ўладзімер адказвае, што на тым месцы па вуліцы Шаранговіча было проста неаранае поле, прыкладаючы спадарожнікавы здымак 1984 году, дзе бачна НВА «Цэнтар».
