120 з 193 дзяржаваў, у тым ліку Беларусь і Расея, прагаласавалі ў Генэральнай асамблеі ААН за рэзалюцыю з заклікам да прыпыненьня агню ў сэктары Газа. Супраць прагаласавалі 14 дзяржаў: Ізраіль, ЗША, Аўстрыя, Вугоршчына, Харватыя, Чэхія, Гватэмала, Парагвай і шэсьць краін Акіяніі. Яшчэ 45 ад выбару ўстрымаліся, некалькі краін у галасаваньні ўдзельнічаць ня сталі.
Рэзалюцыя заклікае да «неадкладнага, трывалага і ўстойлівага гуманітарнага перамір’я» паміж ізраільскімі войскамі і баевікамі ХАМАС у сэктары Газа, да павагі прынцыпаў міжнароднага права і дастаўкі гуманітарнай дапамогі.
У дакумэнце ня згадваецца напад баевікоў ХАМАС на Ізраіль. Канада пры падтрымцы ЗША прапанавала ўключыць у рэзалюцыю асуджэньне нападу ХАМАС, а таксама заклік да вызваленьня закладнікаў, аднак неабходнай колькасьці галасоў папраўка не набрала.
Пасьля галасаваньня прадстаўнік Ізраілю ў ААН Гілад Эрдан заявіў, што ААН больш не валодае нават кропляй легітымнасьці, і абвінаваціў арганізацыю ў імкненьні забясьпечыць далейшыя злачынствы. Паводле яго, з ХАМАС ня можа быць ніякіх перамоваў і дыскусій, і Ізраіль ня будзе сядзець склаўшы рукі, каб дазволіць групоўцы зноў учыняць зло. Ён дадаў, што ўсе зацікаўленыя ў спыненьні гвалту павінны заклікаць ХАМАС скласьці зброю, здацца і вярнуць усіх закладнікаў.
Кіраўнік МЗС Ізраіля Элі Коэн назваў рэзалюцыю «ганебнай» і заявіў, што «Ізраіль мае намер зьнішчыць ХАМАС гэтак жа, як сьвет расправіўся з нацыстамі і Ісламскай дзяржавай».
Рэзалюцыя ня мае юрыдычнай сілы, аднак гэта першы адказ ААН на вайсковыя дзеяньні пасьля нападу ХАМАС на Ізраіль. Раней Рада бясьпекі ААН чатыры разы не змагла дасягнуць кансэнсусу па якіх-небудзь дзеяньнях.
Вайна Ізраілю з ХАМАСам. Асноўнае
- 7 кастрычніка Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
- Разбуральная вайна Ізраілю ў cэктары Газа ў лічбах.
-
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
-
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША.
- Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
