Раённыя ўлады ў Астраўцы вырашылі даць назвы праектаваным вуліцам і праездам у раёнах сядзібнай і шматкватэрнай забудовы ў цэнтры Астраўца. Гараджан заклікалі выказацца з гэтай нагоды, але тыя абурыліся і нават стварылі пэтыцыю супраць прапанаваных назваў, заўважыла выданьне Hrodna life.
Прапанаваныя назвы — вуліцы Народная, Жураўліная, Добрая, Сямейная, Салаўіная, Ясная, Дружбы, Мірная, 9 мая, 17 верасьня і Мінская. Меркаваньні грамадзян наконт назваў вуліц у пісьмовай форме зьбіраюць на афіцыйны адрас райвыканкаму (Астравец, вул. Кастрычніцкая, 8) і на электронную пошту arhit-ostrovec@mail.ru.
Гараджан абурылі прапанаваныя ўладамі назвы вуліц Астраўца, і яны стварылі пэтыцыю, каб зьвярнуцца да ўладаў калектыўна.
«Прапанаваныя да прысваеньня назвы настолькі абстрактныя, што не нясуць у сабе аніякага сэнсу. У гэты час неўшанаванымі застаюцца імёны выдатных беларусаў, жыхароў Астравеччыны, чыя дзейнасьць на карысьць грамадзтва мусіць быць прыкладам для ўсіх», — пішуць стваральнікі пэтыцыі.
Яны таксама пералічылі асобаў, зьвязаных з краем, якіх, на іх думку, варта ўшанаваць у гарадзкой тапаніміцы:
- Альбін Стаповіч — паэт, публіцыст і музыка;
- Янка Быліна — паэт, драматург і сьвятар зь вёскі Лакцяны;
- Мар’ян Богуш-Шышка — мастак з Трокенікаў;
- Іосіф Гашкевіч — вучоны-мовазнаўца, дасьледчык Японіі і Кітаю, які правёў апошнія гады свайго жыцьця ў Малях;
- Леў Дабжынскі — мастак, пахаваны ў вёсцы Лоша ў 1938 годзе;
- Казімір Сваяк — грамадзка-палітычны дзеяч, паэт, драматург, публіцыст, літаратуразнавец, каталіцкі сьвятар, які нарадзіўся ў вёсцы Барані.
«Пакуль гэтыя асобы не ўшанаваныя, не зразумела, як гаворка можа ісьці пра ўшанаваньне салаўёў і жураўлёў — які прыклад яны падаюць, які нацыянальны гонар яны абуджаюць у жыхароў горада? Ніякі», — адзначаюць аўтары пэтыцыі.
На момант публікацыі матэрыялу пэтыцыю падпісаў 41 чалавек. Подпісы зьбіраюць да 23 лістапада. Пасьля яе накіруюць у Астравецкі райвыканкам.
У Астраўцы не ўпершыню спрабуюць ушанаваць славутых землякоў. У чэрвені 2022 году ў Астравецкі райвыканкам паступаў зварот чальцоў грамадзкага аб’яднаньня «Беларускі фонд культуры» аб увекавечаньні памяці літаратуразнаўцы і гісторыка Адама Мальдзіса, які нарадзіўся ў Астравецкім раёне.
24 чэрвеня 2022 году выйшла рашэньне Астравецкага райвыканкаму № 461 «Аб перайменаваньні дзяржаўнай установы культуры «Астравецкая раённая бібліятэка», але ўжо ў ліпені прарасейская актывістка Вольга Бондарава дамаглася таго, што Горадзенскі аблвыканкам адмяніў рашэньне аб прысваеньні бібліятэцы імя Адама Мальдзіса.
