Суд за пратэсты ў Берасьці
У судзе Ленінскага раёну Берасьця 7 кастрычніка пачалі судзіць трох чалавек паводле ч. 1 арт. 342 Крымінальнага кодэксу («Актыўны ўдзел у дзеяньнях, што груба парушае грамадзкі парадак»). Пад суд патрапілі Сяргей Нічыпарук, Аляксандр Клімашэвіч, Яўген Бычко, піша «Вясна».
Праваабаронцам вядома, што дырэктара берасьцейскай кампаніі Яўгена Бычко жорстка затрымалі на трасе M1 у сярэдзіне ліпеня. Мужчыну спынілі супрацоўнікі ДАІ, а пазьней пад’ехалі сілавікі, якія яго і затрымалі. На відэа сілавікоў берасьцеец кажа, што ўдзельнічаў у паслявыбарнай акцыі пратэсту ў сваім горадзе.
Крымінальную справу супраць берасьцейцаў разглядае Крысціна Папова. Паводле «Вясны», такім чынам у Берасьці пачалі судзіць ужо 11-ю групу людзей за «грубае парушэньне парадку» падчас пратэстаў у 2020 годзе.
Затрымалі менчука за публікацыю у Telegram інфармацыі аб перамяшчэньні сілавікоў
Відэа з затрыманым менчуком апублікаваў праўладны тэлеграм-канал. На ім мужчына кажа, што ў 2020 годзе ў «экстрэмісцкія» тэлеграм-чаты перадаваў інфармацыю аб перамяшчэньні сілавікоў, браў удзел у дваровых чаяваньнях і шукаў начальніка Акрэсьціна ў «дэструктыўных» чатах.
У якім статусе знаходзіцца затрыманы і па якім артыкуле яго абвінавачваюць — невядома. У роліку мужчына паведаміў, што яго арыштавалі на 15 сутак.
