Кандыдат на прэзыдэнта Тацяна Караткевіч сустрэлася з выбаршчыкамі ў Івацэвічах і Бярозе.
Каля ста чалавек прыйшлі на сустрэчу з кандыдаткай у Івацэвічах і прыблізна столькі ж у Бярозе.
Людзі ня толькі пыталіся аб праграме кандыдата, але і зьвярталіся па дапамогу ў вырашэньні сваіх праблемаў. У Івацэвічах эмацыйна выступіла жанчына, якая баіцца страціць жыльлё. У Бярозе на сустрэчу прыйшла сям’я Якушыкаў, якую мясцовыя ўлады пазбавілі пляца ў цэнтры гораду.
Большасьць пытаньняў выбаршчыкаў тычыліся эканамічных праблемаў. У абодвух гарадах пыталіся думкі Тацяны Караткевіч пра падатак на дармаедзтва.
«Гэты падатак павінен быць адменены», — адназначна заявіла кандыдатка.
Цікавіла людзей і пытаньне, як абараніць свае галасы. Тацяна Караткевіч сказала, што трэба ўсім прыйсьці і прагаласаваць за яе:
«Тады ва ўладаў ня будзе магчымасьці сфальсыфікаваць выбары, калі за мяне прагаласуе відавочная большасьць».
