Згуртаваньне беларусаў сьвету "Бацькаўшчына” ў выказвае занепакоенасьць з нагоды спыненьня перадач “Радыё Швэцыя” на беларускай мове.
Пра гэтае рашэньне паведаміў кіраўнік Міжнароднага канала Швэдзкага нацыянальнага радыё Інгэмар Лёфгрэн.
Перадачы па-беларуску гучалі ў эфіры “Радыё Швэцыя” ад 2004 года. Журналісты беларускай рэдакцыі расказвалі ў іх пра Швэцыю як пра дэмакратычную краіну і тым самым садзейнічалі дэмакратычнаму разьвіцьцю Беларусі, напісана ў звароце. Вялікая ўвага надзялялася асьвятленьню беларускай культуры, швэдзка-беларускіх адносінаў. Слухачамі перадачы былі таксама прадстаўнікі беларускай дыяспары ў Швэцыі ды іншых эўрапейскіх краінаў.
Спыненьне перадач па-беларуску не толькі перавядзе да зьмены моўнага асяродзьдзя, але і паўплывае на зьмест праграмы
“Спыненьне перадач па-беларуску не толькі перавядзе да зьмены моўнага асяродзьдзя, але і паўплывае на зьмест праграмы. Больш за тое, спыненьне вяшчаньня па-беларуску зьменшыць прысутнасьць беларускай мовы ў сьвеце, што нельга дапусьціць, улічваючы сёньняшнюю сытуацыю з мовай у Беларусі і пагражальныя асымілятыўныя працэсы сярод беларусаў замежжа”,-- заяўляе "Бацькаўшчына”.
Арганізацыя заяўляе, што пакуль Беларусь не стала незваротна на шлях дэмакратызацыі, пакуль існуе небясьпека зьнікненьня роднай мовы тытульнай нацыі, нельга пазбаўляць беларусаў адной з нешматлікіх магчымасьцяў атрымліваць праўдзівую інфармацыю па-беларуску.
“Бацькаўшчына” выказвае спадзеў што рашэньне пра спыненьне вяшчаньня па-беларуску будзе адменена і заклікае беларусаў на Радзіме і ў замежжы, далучыцца да кампаніі па падтрымцы беларускіх праграм Швэдзкага радыё і накіроўваць лісты з патрабаваньнем працягнуць вяшчаньне па-беларуску пасьля 1 верасьня 2009 года на наступныя адрасы:
Генэральны дырэктар Швэдзкага радыё Mr. Mats Svegfors
Намесьніца гендырэктара Ms. Cilla Benkö
Кіраўнік Міжнароднага каналу Mr. Ingemar Löfgren
Кіраўніца "Радыё Швецыя" Ms. Gundula Adolfsson