Павал Цыняўскі, якога пачалі судзіць у Фрунзенскім раённым судзе паводле абвінавачаньня ў забойстве дзяўчыны Юліі Саламацінай ды зьнішчэньні яе цела і дакумэнтаў з мэтай схаваць злачынства, у судзе цалкам прызнаў сваю віну.
Пры гэтым даваць паказаньні падсудны адмовіўся. Ранейшыя паказаньні Паўла Цыняўскага, якія ён даваў на сьледзтве, зачытваў прадстаўнік пракуратуры Сяргей Кротаў.
Пракурор Кротаў.
З гэтых паказаньняў вынікае, што Цыняўскі пасьля яўкі з павіннай спачатку казаў сьледчым, што проста штурхнуў Юлю Саламаціну падчас сваркі, ад чаго тая ўдарылася скроньню і памерла. Але потым прызнаўся, што задушыў дзяўчыну папругай.
Паводле паказаньняў Цыняўскага, ён прапанаваў Юлі Саламацінай уступіць зь ім у інтымную блізкасьць, але дзяўчына адмовілася. Тады ён раззлаваўся і парэзаў ёй руку нажом. Потым нібыта дапамог ёй забінтаваць руку, але зноў узьнік канфлікт.
«Я апрытомнеў, калі яна ўжо хрыпела ад сьцісканьня папругі», — паведаміў на сьледзтве Павал Цыняўскі, які прызнаў, што напярэдадні выпіў каля дзьвюх бутэлек гарэлкі.
Your browser doesn’t support HTML5
Абвінавачаны ў забойстве Юлі Саламацінай цалкам прызнаў сваю віну
Жудасныя падрабязнасьці справы прагучалі, калі дайшло да акалічнасьцяў зьнішчэньня цела дзяўчыны. Паводле паказаньняў Паўла Цыняўскага, у гэтым яму дапамагала маці, Галіна Цыняўская. У выніку цела дзяўчыны было разьдзеленае на кавалкі, якія часткова зьнішчылі, а часткова спалілі.
Галіна Цыняўская хаваецца ад фотакамэр.
Допыт Галіны Цыняўскай адбудзецца пасьля агалошваньня паказаньняў яе сына.
У судзе прысутнічае маці пацярпелай і яе сваякі, якія папрасілі журналістаў іх не фатаграфаваць.
Старшынюе на судзе судзьдзя Жана Жукоўская.