Паводле Парашэнкі, некалькі тыдняў таму ў яго была размова зь Нямцовым. «Ён казаў, што павінен паведаміць пераканаўчыя доказы ўдзелу расейскіх Узброеных Сіл у падзеях ва Ўкраіне, і Барыс не баяўся гэтага», — цытуе Парашэнку агенцтва УНІАН.
Масква абвінавачваньні ў падтрымцы сэпаратыстаў на ўсходзе Ўкраіны адхіляе.
Парашэнка назваў Нямцова вялікім сябрам Украіны і патрыётам Расеі.
Ён змагаўся і аддаваў усё магчымае для абароны свабоды ў сваёй краіне.
«Ён змагаўся і аддаваў усё магчымае для абароны свабоды ў сваёй краіне. 1 сакавіка ён павінен быў прадэманстраваць, што ёсьць іншая Расея, якая любіць Украіну, паважае правы і свабоды людзей», — заявіў украінскі прэзыдэнт.
У суботы на Майдане ў цэнтры Кіева была арганізаваная акцыя памяці Барыса Нямцова. Як адзначае УНІАН, сабрацца менавіта тут вырашылі ў сувязі з тым, што Нямцоў ня раз бываў на майдане Незалежнасьці і падчас Аранжавай рэвалюцыі, і падчас Рэвалюцыі годнасьці — так ва Ўкраіне называюць масавыя выступы прыхільнікаў эўраінтэграцыі 2013-2014 гадоў, якія прывялі да зьмены ўлады ў краіне.
На наступны дзень пасьля забойства Барыса Нямцова ўкраінцы несьлі кветкі і сьвечкі да яго фатаграфіяў на Майдане. Акцыю арганізавалі праз сацыяльныя сеткі.