Абарона Надзеі Саўчанкі асьцерагаецца, што яна гатовая пайсьці на адчайныя дзеяньні.
«Сухая галадоўка Надзеі не пакідае нікому часу на манэўры. Турэмнае начальства адказвае за яе жыцьцё галавой, у іх напэўна ёсьць плян, як карміць яе прымусова. Надзея казала, што на гэты выпадак і ў яе ёсьць запасны плян. Я няе ведаю, нападзе яна на ахоўнікаў або зробіць нешта яшчэ настолькі ж адчайнае», — напісаў у Фэйсбуку адвакат Ільля Новікаў. «Зь першых дзён у СІЗА ў ліпені 2014 яна лічыцца на спэцыяльным уліку як схільная да ўцёкаў, нападу і суіцыду. Ня тое каб яна ўжо тады давала для гэтага падставы, але ўсе, што завецца, сумленна папярэджаныя», — падкрэсьлівае Новікаў. Акрамя таго, ён перакананы ў немагчымасьці адгаварыць яго падабаронную ад галадоўкі.
Раней упаўнаважаны па правах чалавека ў Расеі Эла Памфілава паведаміла па тэлефоне сястры Саўчанкі Веры, што стан Надзеі здавальняючы, за ёй усталяваны візуальны кантроль, ёй вымяраюць ціск; прымусовага кармленьня і ўвядзеньня вадкасьці пакуль не патрабуецца. Пра гэта напісаў у «Твітэры» адзін з адвакатаў Мікалай Полазаў. Ён таксама прывёў словы Памфілавай пра тое, што ўжо сфарміравана група ўкраінскіх лекараў для абсьледаваньня Надзеі, але дата іх допуску да арыштаванай пакуль ня ўзгоднена.
Последняя информация о состоянии здоровья Надежды Савченко #FreeSavchenko https://t.co/g6uxjSsomz pic.twitter.com/ucHHziovxJ
— Николай Полозов (@Moscow_advokat) March 6, 2016
Сухую галадоўку Саўчанка праводзіць з 3 сакавіка на знак пратэсту супраць таго, што суд ня даў ёй выступіць з апошнім словам. Пры гэтым яна забараніла карміць сябе гвалтам, аднак, як тлумачылі адвакаты, паводле расейскіх законаў, ёй ня могуць дазволіць памерці.
У нядзелю ж адвакат ваеннаслужачай Марк Фейгін заявіў у інтэрвію ўкраінскаму інтэрнэт-выданьню «Новы час», што ўжо ў канцы сакавіка — красавіка Саўчанку могуць адправіць адбываць пакараньне на радзіму ў абмен на перадачу Расеі двух затрыманых ва Ўкраіне супрацоўнікаў ГРУ Аляксандра Аляксандрава і Яўгена Ерафеева.
Надзея Саўчанка абвяргае абвінавачваньні расейскага сьледзтва ў дачыненьні да забойства двух журналістаў і патрабуе неадкладна вярнуць яе на радзіму. Гэта ўжо ня першая яе галадоўка з моманту арышту летам 2014 году.