«Ваенныя рашэньні — у поўнай гатоўнасьці,» — напісаў Трамп ў сваім твітэры. «Спадзяюся, што Кім Чэн Ын абярэ іншы шлях».
Military solutions are now fully in place,locked and loaded,should North Korea act unwisely. Hopefully Kim Jong Un will find another path!
— Donald J. Trump (@realDonaldTrump) August 11, 2017
Прэзыдэнт ЗША і высокапастаўленыя прадстаўнікі ягонай адміністрацыі падвяргаюць Паўночную Карэю ўсё больш вострай крытыцы ў адказ на выпрабаваньні міжкантынэнтальных балістычных ракет, якія праводзіць гэтая краіна.
Напярэдадні прэзыдэнт ЗША заявіў, што ў адносінах з Паўночнай Карэяй ён заўсёды будзе адданы ідэі перамоваў. Паводле яго слоў, аднак, Пхэньяну варта «вельмі, вельмі нэрвавацца», калі б там вырашылі прычыніць шкоду Злучаным Штатам.
8 жніўня Трамп заявіў, што ЗША адкажуць «агнём і лютасьцю» на паўночнакарэйскія пагрозы на адрас Злучаных Штатаў. Заява прэзыдэнта прагучала пасьля публікацыі ў газэце The Washington Post — у яе інфармацыі прыводзіліся высновы аналітыкаў амэрыканскай вайсковай выведкі аб тым, што Пхэньяну ўдалося стварыць мініятурную ядзерную боегалоўку, якая можа быць выкарыстана ў балістычных ракетах.
Пасьля гэтага прадстаўнікі войскаў Паўночнай Карэі заявілі 9 жніўня, што «старанна вывучаюць» пляны ракетнай атакі па ціхаакіянскім востраве Гуам.
Яны прайграюць любую гонку ўзбраеньняў ці канфлікт, які распачнуць.
Міністар абароны ЗША Джэймс Мэтыс заявіў 9 жніўня, што Паўночная Карэя «павінна спыніць любы разгляд дзеяньняў, якія прывядуць да канца рэжыму і зьнішчэньня народу».
«Дзеяньні рэжыму КНДР будуць значна пераўзыдзеныя нашымі, і яны прайграюць любую гонку ўзбраеньняў ці канфлікт, які распачнуць,» — гаворыцца ў ягонай заяве.
У мінулую суботу Рада Бясьпекі ААН аднагалосна прыняла рэзалюцыю аб узмацненьні санкцый супраць КНДР у адказ на выпрабаваньні міжкантынэнтальных балістычных ракет.