Прэзыдэнт ЗША Дональд Трамп назваў «амэрыканскай ганьбай» расьсьледаваньне Міністэрства юстыцыі і ФБР абвінавачваньняў яго каманды ў сувязях з Расеяй.
«Расейскае паляваньне на ведзьмаў працягваецца. Не было ні змовы, ні перашкодаў расьсьледаваньню. Гэта амэрыканская ганьба!», — напісаў Трамп ў твітэры.
Ён лічыць, што рассакрэчаны мэмарандум пра ФБР «цалкам рэабілітуе» Трампа».
This memo totally vindicates “Trump” in probe. But the Russian Witch Hunt goes on and on. Their was no Collusion and there was no Obstruction (the word now used because, after one year of looking endlessly and finding NOTHING, collusion is dead). This is an American disgrace!
— Donald J. Trump (@realDonaldTrump) February 3, 2018
2 лютага ў ЗША апублікавалі рассакрэчаны мэмарандум, падрыхтаваны заканадаўцамі-рэспубліканцамі. У ім, у прыватнасьці, гаворыцца пра нібыта незаконны запыт ФБР на праслухоўваньне ў 2016 годзе размоў сябра перадвыбарчага штабу Дональда Трампа, абранага пасьля прэзыдэнтам ЗША.
У аснову дакумэнту легла інфармацыя з так званага дасье на Трампа, якое, як сьцьвярджаецца, рабілася на замову перадвыбарчага штаба кандыдата ў прэзыдэнты ад Дэмакратычнай партыі Гілары Клінтан.
Дэмакраты раней заявілі, што мэтай дакумэнта зьяўляецца дыскрэдытацыя расьсьледаваньня умяшаньні Расеі ў прэзыдэнцкія выбары ў ЗША і магчымай змове штабу Трампа з Крамлём. Яны сьцьвярджаюць, што рэспубліканцы адрэдагавалі гэтую службовую запіску.
У ФБР заявілі, што дакумэнт «недакладна адлюстроўвае падзеі і можа прывесьці да раскрыцьця важных разьведвальных дадзеных і мэтадаў іх збору».
Сам Дональд Трамп абвінаваціў Міністэрства юстыцыі ЗША і ФБР у палітызацыі расследаванняў. На думку прэзідэнта, у ходзе разглядаў яны аддаюць перавагу дэмакратам у шкоду рэспубліканцам. Адміністрацыя Трампа дала згоду на публікацыю мемарандума.
Масква адмаўляе ўмяшанне ва ўнутраную палітыку Злучаных Штатаў. Дональд Трамп называе расследаванне пра сувязі з Расеяй «паляваннем на ведзьмаў».