Расейскія вайсковыя караблі пакінулі сырыйскі порт Тартус. Пра гэта паведамляе кампанія Image satellite international і прыводзіць спадарожнікавыя здымкі.
ISI reveals: Disappearance of most of the #Russian #Naval Forces from #Tartus Port, #Syria.Those missing naval vessels have now been deployed at sea due to possible near-future #strikes. Only one #kilo class submarine remained.#russiannavy #Syriastrikes #foxnews #kilo pic.twitter.com/guRA9w0qqt
— imagesatintl (@imagesatint) April 11, 2018
На адным здымку бачны прычал, ля якога прышвартаваныя некалькі баявых караблёў (уключаючы фрэгат «Адмірал Грыгаровіч») і судоў забесьпячэньня, а таксама дзьве падводныя лодкі клясу «Варшавянка».
На другім здымку, датаваным 11 красавіка, відаць, што ўсе караблі акрамя адной падводнай лодкі, пакінулі порт.
У кампаніі лічаць, што караблі выведзеныя ў мора з прычыны магчымых удараў ЗША і іх саюзьнікаў па тэрыторыі Сырыі.
У той жа час у сераду Інтэрфакс паведаміў пра падрыхтоўку вучэньняў ВМФ Расеі блізу сырыйскага ўзьбярэжжа.
Раней прэзыдэнт ЗША Дональд Трамп папярэдзіў аб магчымым хуткім нанясеньні ракетных удараў па Сырыі ў адказ на меркаваную хімічную атаку ў горадзе Дума. Вашынгтон таксама ўсклаў адказнасьць на Расею, абвінаваціўшы яе ў заступніцтве сырыйскага рэжыму.
Масква сьцьвярджае, што хімічнай атакі ў Думе, па ўсёй верагоднасьці, не было, называючы паведамленьні пра яе правакацыяй. Канчатковае рашэньне аб ваенным удары па Сырыі Трамп пакуль не прыняў, паведамляе Белы дом.
ААН папярэджвае, што сытуацыя ў Сырыі можа выйсьці з-пад кантролю і заклікае да перамоваў і пошуку кампрамісу.