На пэнсію пайшла Пэгі Ўітсан, якая правяла ў космасе больш часу, чым любы іншы амэрыканскі астранаўт. Уітсан правяла ў космасе 665 дзён, прапрацаваўшы ў трох асобных касьмічных экспэдыцыях, паведамляе Голас Амэрыкі.
Уітсан была першай жанчынай, якая кіравала Міжнароднай касьмічнай станцыяй — яна займала гэтую пасаду двойчы. Яна таксама стала самай старэйшай паводле ўзросту жанчынай, якая калі-небудзь лётала ў космас. З 2009 па 2012 год Уітсан узначальвала атрад астранаўтаў, таксама стаўшы першай жанчынай, якая займала гэтую пасаду.
It’s been the greatest honor to live out my lifelong dream of being a @NASA Astronaut. Thank you to the #NASAVillage and all who have supported me along the way. As I reminisce on my many treasured memories, it’s safe to say my journey at NASA has been out of this world! pic.twitter.com/F4Dzrud4yL
— Peggy Whitson (@AstroPeggy) June 15, 2018
«Для мяне было вялікім гонарам ажыцьцявіць мару ўсяго майго жыцьця, стаўшы астранаўткай NASA», — напісала Ўітсан у «Твітэры». Яна падзякавала «усім, хто падтрымліваў яе ў дарозе» і сказала, што «яе падарожжа з NASA было проста незямным!».
Уітсан, якой 58 гадоў, паводле адукацыі біяхімік. Яна вырасла ў штаце Аёва. На працу ў NASA яна паступіла ў 1986 годзе ў якасьці дасьледчыцы і стала астранаўткай толькі праз 10 гадоў. У верасьні мінулага году Ўітсан зьдзейсьніла свой апошні касьмічны палёт, які доўжыўся каля дзесяці месяцаў. Падчас гэтай місіі Ўітсан і іншыя члены экіпажа правялі сотні навуковых экспэрымэнтаў.
Даўжэй Пэгі Уітсан у космасе знаходзіліся толькі расейскія касманаўты. Сусьветны рэкорд належыць Генадзю Падалку, які правёў у космасе 879 дзён.