Прэзыдэнт Кітаю Сі Цзіньпін анансаваў выдаткаваньне 60 млрд даляраў на разьвіцьцё краінаў Афрыкі цягам наступных трох гадоў і адмовіўся ад спагнаньня запазычанасьцяў з шэрагу найбяднейшых дзяржаваў кантынэнту, піша The Wall Street Journal.
Сі Цзіньпін адрынуў заявы крытыкаў наконт таго, што кітайскія інвэстыцыі могуць пагоршыць даўгавы крызіс у Афрыцы. На выступе перад лідэрамі дзясяткаў афрыканскіх краінаў 3-га верасьня ён апісваў Кітай як «адказную» дзяржаву, якая працуе разам зь дзяржавамі Афрыкі дзеля эканамічнага разьвіцьця, скарачэння беднасьці і барацьбы з пагрозамі бясьпецы.
Шматмільярдныя інвэстыцыі Кітаю ў Афрыку, казаў ён, «не дамагаюцца карысьлівых палітычных інтарэсаў». Сі Цзіньпін заявіў, што для ацэнкі кітайска-афрыканскай супрацы найбольш кваліфікаваныя самі кітайцы і афрыканцы і што ні пра якую «даўгавую пастку» гаворкі не ідзе. Пэкін таксама адрынуў абвінавачваньні ў тым, што ў Афрыцы выкарыстоўваецца зашмат кітайскай працоўнай сілы замест мясцовай.
Як адзначае Reuters, ён таксама засьцярог афрыканцаў ад «іміджавых» праектаў — кітайская дапамога, маўляў, перадусім накіраваная супраць таго, што тармазіць разьвіцьцё дзяржаваў, супраць «вузкіх месцаў» разьвіцьця.
Адзначаецца, што сярод гасьцей у Кітаі быў і прэзыдэнт Судана Амар аль-Башыр, які знаходзіцца ў вышуку Міжрароднага крымінальнага суду. Ды Сі Цзіньпін заявіў, што гэты суд ня мусіць перашкаджаць міжнародным справам Судану.
ГЛЯДЗІЦЕ ТАКСАМА: Ці робіцца Кітай новым «старэйшым братам» Беларусі ГЛЯДЗІЦЕ ТАКСАМА: «Я лячу туды, дзе прымаюць»: навошта Лукашэнку афрыканскае турнэ ГЛЯДЗІЦЕ ТАКСАМА: Лукашэнка і Макей задумалі «пачаць асваеньне Афрыкі з Анголы»