Міністр абароны Джым Мэтыс, генэрал марской пяхоты ў адстаўцы, пакіне свой пост у канцы лютага. Пра гэта напісаў увечары 20 сьнежня ў Twitter прэзыдэнт Дональд Трамп.
General Jim Mattis will be retiring, with distinction, at the end of February, after having served my Administration as Secretary of Defense for the past two years. During Jim’s tenure, tremendous progress has been made, especially with respect to the purchase of new fighting....
— Donald J. Trump (@realDonaldTrump) 20 декабря 2018 г.
«За час працы Джыма быў дасягнуты вялізны прагрэс, асабліва ў сфэры закупак новых узбраеньняў, — піша Дональд Трамп. — Генэрал Мэтыс аказаў мне вялікую дапамогу ў працы з нашымі саюзьнікамі і іншымі краінамі».
Ён дадаў, што неўзабаве назаве імя новага кіраўніка Пэнтагону, і яшчэ раз падзякаваў Мэтысу за ягоную службу.
Адстаўка Джыма Мэтыса ня стала нечаканасьцю: пра гэта загаварылі ў сераду, калі Трамп абвясьціў аб вывадзе амэрыканскіх вайскоўцаў з Сырыі. Прэзыдэнт зрабіў гэтую заяву, нягледзячы на шматлікія пярэчаньні з боку кіраўнікоў Пэнтагону і саюзных краінаў.
Упершыню чуткі пра магчымую адстаўку Мэтыса зьявіліся ў кастрычніку, калі ў інтэрвію CBS Трамп заявіў, што кіраўнік Пэнтагону «трохі дэмакрат», і выказаў здагадку, што Мэтыс можа неўзабаве пакінуць сваю пасаду.
Адразу пасьля цяперашняга выступленьня Трампа ў інтэрнэце Джым Мэтыс апублікаваў афіцыйную заяву аб сыходзе. У сваім лісьце ён выказаў надзею, што на пасаду міністра абароны будзе прызначаны чалавек, які цалкам падзяляе погляды прэзыдэнта на абаронную палітыку краіны.
ГЛЯДЗІЦЕ ТАКСАМА: Кіраўнік Пэнтагону заклікаў да перамоваў з Расеяй «з пазыцыі сілы»