На менскім заводзе «Інтэграл» на двух мужчын абвалілася частка будынка на вуліцы Казінца, які зараз дэмантуюць. Мужчыны загінулі, піша Сьледчы камітэт.
Абноўлена, 18:15: Сьледчы камітэт паведаміў, што крымінальная справа распачатая паводле артыкулу за «парушэньне правілаў бясьпекі будаўнічых работаў, якое па неасьцярожнасьці пацягнула сьмерць чалавека» (ч.2 арт. 303 КК РБ). Вінаватага могуць пакараць абмежаваньнем волі да 5 гадоў або пазбаўленьнем волі на тэрмін ад 2 да 7 гадоў з пазбаўленьнем права займаць пэўныя пасады. Расьсьледаваньне працягваецца, прызначаны шэраг экспэртызаў.
63-гадовы мужчына загінуў на месцы здарэньня, другі ж памёр па дарозе ў мэдыцынскую ўстанову.
«Будынак быў закінуты, яго зносілі, абгарадзіўшы два мэтры каля дарогі. Там хадзілі людзі і езьдзілі машыны», — піша Onliner.by са спасылкай на відавочцу здарэньня.
Завод «Інтэграл» у Менску
Намесьнік генэральнага дырэктара прадпрыемства па пэрсанале Мікалай Тарасевіч знаходзіцца на тэрыторыі «Інтэграла», — паведамілі Свабодзе ў прыёмнай. Іншую інфармацыю ў прыёмнай і канцылярыі не камэнтуюць.
Астатнія тэлефоны прадпрыемства не адказваюць ці пераключаныя на аўтаадказчык.
ГЛЯДЗІЦЕ ТАКСАМА: Што вядома пра «Інтэграл», дзе на двух супрацоўнікаў абрынулася сьцянаНа месцы здарэньня праводзяць агляд сьледча-апэратыўная група, супрацоўнікі МНС і міліцыі. У прэсавай службе МНС сказалі, што іх супрацоўнікі на месца здарэньне не выклікаліся.
ГЛЯДЗІЦЕ ТАКСАМА: Ад «Пінскдрэва» да «Інтэграла»: 9 трагедый на беларускіх прадпрыемствах апошніх гадоў