У Казахстане падаў у адстаўку Нурсултан Назарбаеў, які кіраваў дзяржаваю яшчэ з савецкага часу. Ён займаў пасаду 30 гадоў, даўжэй за ўсіх постсавецкіх прэзыдэнтаў. Свабода паглядзела, як зьмяняліся прэзыдэнты ў былых 15 савецкіх рэспубліках.
Як зьмяняліся прэзыдэнты ў 15 постсавецкіх дзяржавах (без уліку часовых выканаўцаў абавязкаў)
Найбольш прэзыдэнтаў зьмянілася ва Ўкраіне (5), Азэрбайджане (5) і Малдове (5). Доўгі час Нурсултан Назарбаеў заставаўся галоўным палітычным доўгажыхаром, цяпер ён саступіў месца на алімпе найбольш непатапляльных прэзыдэнтаў Аляксандру Лукашэнку, які кіруе Беларусьсю ўжо 25 гадоў.
За постсавецкі час прэзыдэнты не мяняліся ў Таджыкістане, дзе гэтую пасаду 25 гадоў займае Эмамалі Рахмон, і ў Беларусі. Лукашэнка прэзыдэнт даўжэй на пару месяцаў, але Рахмон даўжэй кіруе дзяржаваю (да прэзыдэнцтва быў старшынём Вярхоўнага савету). У Казахстане адбылася першая зьмена, пакуль дзяржавай часова кіруе сьпікер парлямэнту Касым-Жамарту Такаеў.
Больш за 10 гадоў не зьмяняліся прэзыдэнты ў Расеі і Туркмэністане:
- У Расеі ўлада зьмянялася тройчы, агулам Уладзімір Пуцін кіруе 15 гадоў;
- Другі прэзыдэнт Туркмэністану Гурбангулы Бэрдымухамэдаў кіруе дзяржавай з 2007 году.