Судовыя выканаўцы ў межах крымінальнай справы арыштавалі маёмасьць берасьцейскага блогера Сяргея Пятрухіна, піша «Берасьцейская вясна». Чатыры адзінкі тэхнікі ацанілі ў 165 рублёў:
- пральная машына Samsung 2007 году выпуску — 100 рублёў;
- прынтэр Samsung узростам 18 гадоў — 50 рублёў (яго ўжо арыштоўвалі ў жніўні 2018 году);
- няспраўная мікрахвалевая печ LG 2008 году (працаздольнасьць не правяралася) — 5 рублёў;
- 17" манітор Samsung (працаздольнасьць не правяралася) — 10 рублёў.
Цэны запісаныя са слоў самога Пятрухіна, вынікае з пратаколу. Сам Пятрухін заявіў, што хацеў бы, каб гэтыя рэчы пайшлі «на карысьць ахвяраў злачынства — супрацоўнікаў Ленінскага РАУС». Ён мяркуе, што ад ягоных дзеяньняў найбольш пацярпеў міліцыянт Сяргей Ігнацюк, якога Пятрухін «мала таго, што назваў безвалосым, дык і абгаварыў на дадатак».
Пярухіна ў красавіку аштрафавалі на 14 950 рублёў за абразу чатырох міліцыянтаў. Ён не прызнаў сябе вінаватым.
Блогер Сяргей Пятрухін вядомы ў Берасьці асьвятленьнем тэмаў карупцыі, скаргаў на міліцыянтаў. Апошні год рэгулярна асьвятляе пратэсты супраць пабудовы акумулятарнага заводу пад Берасьцем. Праваабарончы цэнтар «Вясна» назваў суд над блогерам палітычна матываваным.