Ва ўкраінскім Жытоміры завяршылася сустрэча тэт-а-тэт кіраўнікоў Беларусі і Ўкраіны, якая цягнулася больш за дзьве гадзіны.
«Мы разумеем адно аднаго, — заявіў пасьля сустрэчы прэзыдэнт Украіны Ўладзімір Зяленскі. — Я думаю, што нашыя людзі прыязныя, маральна блізкія. Я ганаруся і ўпэўнены, што кожны ўкраінец ганарыцца тым, што ў нас такія добрыя суседзі і адносіны».
Лукашэнка расказаў, што сустрэча прайшла, каб яшчэ раз «зьверыць гадзіньнікі».
«У вас ніколі не было праблемаў з тэрыторыяй Беларусі і зь Беларусьсю, вы ніколі іх ня будзеце мець, — казаў ён. — Мы заўсёды будзем самымі добрымі і надзейнымі з вашых прыхільнікаў, партнэраў, і калі новы ўрад Украіны захоча мець з намі братэрскія блізкія адносіны, то за намі справа ня стане».
Пасьля Зяленскі і Лукашэнка выступілі перад удзельнікамі ІІ Форуму рэгіёнаў Беларусі і Ўкраіны.
Зяленскі падзякаваў Лукашэнку за тое, што украінска-беларуская мяжа ва ўмовах расейскай агрэсіі застаецца «мяжой міру і супрацы», і за наданьне пляцоўкі для перамоваў па Данбасе.
Зяленскі расказаў, што ў размове з Лукашэнкам згадаў таксама пытаньні таваразвароту, «абмену тэлеканаламі», турызму і культурнага абмену.
Ён разважаў, да каго бліжэйшыя беларусы: да расейцаў ці ўкраінцаў.
«Адказ у прозьвішчах паважаных гасьцей Беларусі», — сказаў ён, паглядзеўшы на Лукашэнку і віцэ-прэм’ера Беларусі Ляшэнку.
Лукашэнка параўнаў сустрэчу зь Зяленскім і абмеркаваньне двухбаковай супрацы з разборам завалаў — і прапанаваў праводзіць беларуска-ўкраінскія форумы часьцей. Ён таксама згадаў стварэньне супольных беларуска-ўкраінскіх прадпрыемстваў, параўнаў з пытаньнямі дзяржаўнай бясьпекі пастаўкі нафты і нафтапрадуктаў, альтэрнатыўныя шляхі паставак вуглевадароднай сыравіны.
Сябруюць супраць Расеі?
Лукашэнка адзначыў, што ў сьвеце «ніхто ніколі не дазволіць нам вельмі моцна сябраваць, бо, на жаль, сьвет дзейнічае паводле прынцыпу „падзяляй і ўладар“». Ён заявіў, што журналісты, якія гэта пачуюць, падумаюць, што «мы нібыта супраць Расеі і Кітаю нацэленыя».
Зяленскі адказаў: «А вы не саромейцеся гэтага». Пасьля аплядысмэнтаў дадаў: «Гэта жарт, Аляксандар Рыгоравіч».
Лукашэнка ж сказаў яму: «Я вас за язык не цягнуў. Я не саромеюся». Але пасьля казаў, што «мы добрыя людзі, мы нармальныя людзі, мы ня хочам супраць кагосьці сябраваць, мы ня хочам супраць кагосьці ваяваць».
ГЛЯДЗІЦЕ ТАКСАМА: Пра што спытаюць адзін аднаго Лукашэнка і Зяленскі ў Жытоміры ГЛЯДЗІЦЕ ТАКСАМА: «Няхай ваш Лукашэнка навучыць нашага Зяленскага». Жыхары Жытоміра пра сустрэчу кіраўнікоў Беларусі і Ўкраіны. ВІДЭА ГЛЯДЗІЦЕ ТАКСАМА: Цэнтар Жытоміра ачапілі перад сустрэчай Лукашэнкі і Зяленскага. ФОТА