Міністэрства фінансаў Беларусі ацэньвае страты бюджэту-2020 праз пагаршэньне зьнешніх умоў і падатковы манэўр Расеі на 1.9 млрд беларускіх рублёў, паведамляе БелТА са спасылкай на міністра фінансаў Максіма Ермаловіча.
«Ёсьць цэлы шэраг нэгатыўных фактараў, зьвязаных ня толькі з РФ і нашымі ўзаемаадносінамі ў нафтагазавай сфэры, але яшчэ і зь бягучым станам зьнешніх рынкаў, цэнамі на базавыя прадукты, якімі гандлюе Беларусь».
ГЛЯДЗІЦЕ ТАКСАМА: Сусьветны банк панізіў прагноз росту ВУП Беларусі ў 2019 годзеПаводле міністра, частка гэтых страт кампэнсаваная за кошт зробленых Мінфінам дзеяньняў, большай бюджэтнай эканоміі, павышэньня зьбіральнасьці падаткаў, актуалізацыі ўзроўню ставак на ўзровень інфляцыі.
«Але ў цэлым мы атрымліваем у канчатковым выніку сытуацыю, калі бюджэт у намінальным выражэньні застаецца на ўзроўні бягучага года, пры тым, што выдаткі па кансалiдаваным бюджэце павінны ўзрасьці на 9,3%», — сказаў Максім Ермаловіч.
Што важна ведаць пра расейскі падатковы манэўр
Нафтавы падатковы манэўр у Расеі — паступовая замена спагнаньня экспартнага мыта падаткам на здабычу карысных выкапняў (ПЗКВ). Экспартнае мыта будзе зьмяншацца адначасова з павелічэньнем ПЗКВ.
- Расея пачала рэалізацыю падатковага манэўра зь 2019 году.
- Да канца 2018 году экспарт сырой нафты ў Расеі абкладаўся экспартным мытам у памеры 30% ад цаны. Мыта не спаганялася з паставак на ўнутрырасейскі рынак і ў межах квоты ў Беларусь.
- У 2017-2018 гадах квота на пастаўкі бязмытнай расейскай нафты для Беларусі складала 24 млн тон (18 млн тон перапрацоўвалі беларускаія НПЗ, 6 млн тон ішлі на рээкспарт).
- Беларусь мела права абкладаць экспартным мытам свае нафтапрадукты, вырабленыя з расейскай бязмытнай нафты, якія прадавала ў трэція краіны. Беларускае мыта ішло ў беларускі бюджэт.
Страты і кампэнсацыя
- У сьнежні 2018 г. у адміністрацыі Лукашэнкі сьцьвярджалі, што за 3 апошнія гады Беларусь недаатрымала $3,6 млрд, а за наступныя 4 гады недаатрымае $11 млрд пры найгоршым разьвіцьці падзей.
- Паводле падлікаў рэйтынгавага агенцтва Fitch, наўпроставыя страты беларускай эканомікі складуць $10,6 млрд цягам 2019–2024 гг.
- Дырэктар дасьледніцкага цэнтру ІПМ Аляксандар Чубрык падлічыў, што страты для бюджэту Беларусі ў 2019 годзе склалі $272,3 млн.
- У кастрычніку 2018 Расея абяцала пералічыць у бюджэт Беларусі каля $405 млн у якасьці аплаты экспартнага мыта за нафту. Пазьней у кампэнсацыі адмовілі.
- 18 сьнежня 2019 расейскі партал РБК паведаміў са спасылкай на свае крыніцы, што Расея кампэнсуе Беларусі страты ад манэўра праз зваротны акцыз для беларускіх НПЗ. Суму субсыдыяў ацанілі ў $1,5 млрд. Афіцыйнага пацьвярджэньня гэтай інфармацыі не было.
Кароткая гісторыя нафтагазавых канфліктаў Беларусі і Расеі