Удзельнікі Трохбаковай кантактнай групы ва ўрэгуляваньні канфлікту на ўсходзе Ўкраіны дамовіліся аб абмене палоннымі да канца 2019 году. Пра гэта ўвечары 23 сьнежня паведаміў офіс прэзыдэнта Ўкраіны. Гэтую інфармацыю пацьвердзілі і ў АБСЭ.
Пра абмен палоннымі да канца 2019 году і спыненьне агню на Данбасе дамовіліся прэзыдэнты Ўкраіны і Расеі Ўладзімір Зяленскі і Ўладзімір Пуцін падчас сустрэчы ў нармандзкім фармаце 9 сьнежня ў Парыжы, аднак удзельнікам пасяджэньня кантактнай групы ў Менску 18 сьнежня не ўдалося ўзгадніць сьпісы асобаў для абмену. Перамовы паміж Украінай, Расеяй і прадстаўнікамі так званых «ДНР» і «ЛНР» аб абмене палоннымі «ўсіх на ўсіх» зайшлі ў тупік.
Апошні абмен палоннымі паміж Кіевам і «ДНР» і «ЛНР» адбыўся ў канцы сьнежня 2017 году.
Апошні абмен вязьнямі паміж Расеяй і Ўкраінай прайшоў у верасьні 2019 году. З кожнага боку вызвалілі па 35 чалавек.