Пастаўкі нафты з Расеі ў Беларусь у студзені — лютым склалі крыху больш за 700 тысяч тон, што на 76% менш у параўнаньні з аналягічным пэрыядам 2019 году, паведамляе «Інтэрфакс» са спасылкай на апэратыўную зводку Цэнтральнага дыспэтчарскага ўпраўленьня паліўна-энэргетычнага комплексу Расеі.
На мінулым тыдні віцэ-прэм’ер Беларусі Ігар Ляшэнка ў інтэрвію БелТА паведаміў, што агулам сёлета для перапрацоўкі на беларускія нафтаперапрацоўчыя заводы пастаўляецца каля 1 млн тон нафты штомесяц. «Плюс-мінус у раёне мільёну тонаў працуем», — сказаў віцэ-прэм’ер. Адказваючы на пытаньне, які аб’ём прадугледжаны на сакавік, Ігар Ляшэнка заявіў: «У такім жа аб’ёме, як было ў студзені і лютым».
«У гэтым няма супярэчнасьці, — паведаміў у размове са Свабодай старшы аналітык кампаніі "Альпары" Вадзім Іосуб. — Адна лічба (709 тыс. тон за два месяцы — РС.) — гэта колькі нафты нам паставілі з Расеі. Іншая (каля 1 млн. тон у месяц — РС) — колькі мы перапрацавалі. Я думаю, яна ўлічвае невялікія альтэрнатыўныя пастаўкі нафты. З нарвэскіх радовішчаў. Таксама яна ўлічвае нафту з беларускіх радовішчаў. Яе няшмат, але яна ёсць. І па-трэцяе, верагодна, яшчэ ў сьнежні мінулага году рабіліся запасы нафты. У Расеі набывалася больш нафты, чым пасьля перапрацоўвалася. Вось за кошт гэтых запасаў удалося перапрацаваць больш, чым было пастаўлена з Расеі».
ГЛЯДЗІЦЕ ТАКСАМА: Першы танкер з азэрбайджанскай нафтай для Беларусі адгрузяць на гэтым тыдніТое, што у Беларусі ў студзені-лютым 2020 году перапрацоўвалася больш нафты, чым было набыта ў Расеі, Свабодзе таксама пацьвердзілі ў канцэрне «Белнафтахім».
«"Транснафта" дае толькі лічбы таго, што ішло па трубе, — паведамілі ў прэс-службе "Белнафтахіму". — Былі яшчэ пастаўкі іншым транспартам. У тым ліку чыгуначным».
Пастаўкі сыравіны з Расеі на беларускія нафтаперапрацоўчыя заводы у студзені-лютым ажыцьцяўлялі толькі кампаніі групы «Сафмар» расейскага бізнэсоўца Міхаіла Гуцэрыева.
ГЛЯДЗІЦЕ ТАКСАМА: Пяць новых расейскіх кампаній будуць пастаўляць нафту ў Беларусь бяз прэміі, — БелнафтахімПаводле інфармацыі канцэрну «Белнафтахім», ад сакавіка нафту на НПЗ таксама пачнуць пастаўляць пяць новых расейскіх пастаўшчыкоў, якія раней не супрацоўнічалі зь Беларусьсю ў гэтай сфэры.
Пастаўкі нафты зьведзеныя да мінімуму з прычыны адсутнасьці дамоўленасьці з ключавымі пастаўшчыкамі аб цане сыравіны пасьля так званага падатковага манэўру з боку Расеі.
ГЛЯДЗІЦЕ ТАКСАМА: 2024 год наступае ўжо сёлета. Якія папярэднія вынікі нафтавай «вайны» Беларусі і РасеіЗгодна са зьветскамі канцэрну «Белнафтахім», аб’ём нафтаперапрацоўкі за студзень-люты агулам склаў 1,8 мільёна тон. У сакавіку чакаецца перапрацоўка да ўзроўню 1 млн тон нафты, што ўдвая меней за паказьнікі папярэдніх гадоў.
Расея спыніла пастаўкі нафты ў Беларусь. Што здарылася
- 1 студзеня 2020 году Расея спыніла пастаўкі нафты ў Беларусь, але расейская нафта працягвае паступаць транзытам празь Беларусь у Эўропу.
- Беларусь і Расея дагэтуль не дамовіліся пра пастаўкі нафты ў 2020 годзе, хоць Лукашэнка і Пуцін вялі перамовы 30 і 31 сьнежня.
- Прыняты толькі «індыкатыўны балянс»: Расея можа паставіць 24 млн тонаў нафты на год. У 2019-м столькі і паставілі: 18 млн т пайшлі на перапрацоўку, яшчэ 6 млн т на «перамытненьне». Паводле эканаміста Яраслава Раманчука, Беларусі на ўласныя патрэбы хапае 6–7 млн тонаў — астатняе ішло на нафтапрадукты для экспарту або на «перамытненьне».
- 31 сьнежня 2019 году Лукашэнка даручыў завозіць нафту з партоў Балтыі і залучыць альтэрнатыўныя пастаўкі праз магістральны нафтаправод «Дружба».
- Пакуль Мазырскі НПЗ пачаў атрымліваць нафту толькі ад кампаніі расейскага алігарха Гуцэрыева — чакаецца пастаўка ўсяго 750 тысячаў тонаў.
- Беларусь дамовілася пра імпарт 80 тонаў нарвэскай нафты Johan Sverdrup з пастаўкай у літоўскі порт Клайпеда. У Беларусі чакаюць пачатку разгрузкі ўвечары 22 студзеня. Перавалка і транспарт да НПЗ чыгункай будуць каштаваць больш за 20 даляраў за тону.
- Гатоўнасьць транспартаваць нафту ў Беларусь на пастаяннай аснове ўжо выказалі суседнія Латвія (магчымыя аб’ёмы не абвяшчаліся) і Літва (да 3 млн тонаў на год). Пры чым Літва гатовая дастаўляць і газ. Па стане на 21 студзеня «Белнафтахім» мае «практычна гатовыя кантракты» на альтэрнатыўныя пастаўкі.
- Беларускія НПЗ у першай палове студзеня працавалі на леташніх запасах, аб’ёму якіх хапала прыкладна на 20 дзён працы. Экспарт нафтапрадуктаў Беларусь часова прыпыняла ад 1 студзеня, аднавіла ад 21-га.
- Паводле неафіцыйных зьвестак «Інтэрфаксу», Беларусь прапанавала рэалізаваць варыянт разавай пастаўкі нафты з рэсурсаў незалежных пастаўшчыкоў з мэтай павелічэньня запасаў сыравіны на НПЗ на час правядзеньня перамоваў.
- Публічна ж Лукашэнка 21 студзеня паставіў задачу зьнізіць пастаўкі нафты з Расеі да 30-40% ад неабходных аб’ёмаў: «працэнтаў 30 мы павінны з Балтыкі завозіць і працэнтаў 30 праз Украіну». Пастаўкі з Казахстану, заявіў ён, заблякавала Расея.
- Менск і Масква дасюль не ўзгаднілі кампэнсацыю за расейскі падатковы манэўр. У беларускі бюджэт-2020 закладзеныя страты ў памеры 951 млн рублёў.
- Расея дагэтуль не кампэнсавала Беларусі страты за пастаўкі бруднай нафты ў красавіку 2019 году — толькі 20 студзеня 2020-га дамовіліся пра падыходы і мэтодыку кампэнсацыі.
Беларусь — адзіная краіна ў сьвеце, якая багацее на суседзкай нафце, — эканаміст
Усё пачалося з Пуціна. Кароткая гісторыя нафтагазавых канфліктаў Беларусі і Расеі
Ці ўратуе Беларусь эўрапейская нафта? Разьбіраемся з экспэртамі