На сайце Petitions.by зьявілася пэтыцыя з прапановай забараніць рэпэтыцыі і правядзеньне вайсковага параду 9 траўня ў Менску ў сувязі з пандэміяй каранавірусу.
Аўтары пэтыцыі гавораць пра небясьпеку новага каранавірусу, згадваюць абмежавальныя захады, ужо прынятыя ў Беларусі для прадухіленьня распаўсюду інфэкцыі, і патрабуюць:
- забараніць добраахвотна-прымусовы ўдзел работнікаў дзяржаўных арганізацый у вайсковым парадзе з мэтай стварэньня масоўкі;
- адмяніць правядзеньне рэпэтыцый ганаровай варты на тэрыторыі Менску (у тым ліку на праспэктах Машэрава і Пераможцаў);
- забараніць правядзеньне параду вайсковай тэхнікі, каб прадухіліць магчымыя надзвычайныя сытуацыі ў выпадку, калі вайсковай тэхнікай будуць кіраваць хворыя на каранавірус (і падкрэсьліваюць, што такія сытуацыі ўжо былі раней нават пры поўным здароўі яе ўдзельнікаў).
На зэканомленыя грошы ў пэтыцыі прапануюць:
- арганізаваць абыход пажылых людзей (асабліва вэтэранаў, якія ўваходзяць у зону максымальнай рызыкі пры віруснай інфэкцыі), даць ім усе неабходныя мэдыкамэнты ды іншыя прадметы першай неабходнасьці;
- арганізаваць закупку мэдыцынскіх матэрыялаў для дааснашчэньня ўсіх мэдыцынскіх установаў (асабліва па-за Менскам), сродкаў неадкладнай дапамогі;
- накіраваць грошы на азеляненьне Менску для нармалізацыі экалягічнай абстаноўкі і зьніжэньня рызык разьвіцьця розных захворваньняў у насельніцтва; адрамантаваць дарожнае палатно, масты на найбольш аварыйных участках (замест яго бягучага рамонту пасьля праходжаньня вайсковай тэхнікі).
Пад пэтыцыяй на момант публікацыі падпісаліся больш за 3,1 тысячы чалавек.
Пасьля збору подпісаў пэтыцыю плянуюць накіраваць у Міністэрства абароны і Міністэрства аховы здароўя Беларусі.
27 сакавіка Аляксандар Лукашэнка заявіў, што што Дзень Перамогі ў Беларусі адзначаць, як задумвалі, нягледзячы на каранавірус, «ніякія мерапрыемствы не адмяняюцца».
У Менску ўжо рыхтуюцца да вайсковага параду. Так, 26 сакавіка быў абмежаваны рух транспарту на МКАД у сувязі з праездам вайсковай мэханізаванай калёны да аэрадрому Ліпкі, дзе адбываюцца асноўныя трэніроўкі.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ