Урад Літвы падоўжыў карантын да 11 траўня, аднак на наступным тыдні пачнецца другі этап зьмякчэньня яго ўмоваў. Пры выкананьні пэўных правілаў, пачнуць працаваць вулічныя кавярні, салёны прыгажосьці, бібліятэкі, заапаркі.
«Паколькі ў Літве цяпер праводзяць ня толькі рэкордную колькасьць лябараторных дасьледаваньняў, але і колькасьць выпадкаў каранавірусу фіксуецца рэкордна невялікая, лягічна прасоўвацца наперад, зьмякчаючы некаторыя ўмовы», — цытуе Delfi міністра аховы здароўя Літвы Аўрэліюса Вярыгу.
ГЛЯДЗІЦЕ ТАКСАМА: У Літве падчас карантыну 30 тысяч чалавек страцілі працу22 красавіка літоўскі ўрад вырашыў, што другі этап зьмякчэньня карантыну пачнецца 29 красавіка. Міністар аховы здароўя сказаў, што з наступнага тыдня зьявяцца выключэньні і ў парадку нашэньня масак: іх ня трэба будзе насіць у вулічных кавярнях.
Урад плянуе таксама дазволіць працу ўсіх крамаў, уключна з тымі, якія знаходзяцца ў буйных гандлёвых цэнтрах. Аднак крамы павінны забясьпечыць захоўваньне дыстанцыі паміж кліентамі.
Колькасьць пацьверджаных выпадкаў COVID-19 у Літве – 1370; колькасьць сьмерцяў ад каранавіруснай інфэкцыі – 38.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ