Генэральны канструктар пілятаваных касьмічных праграмаў Расеі Яўген Мікрын памёр на 65-м годзе ў бальніцы ў маскоўскай Камунарцы, у яго была дыягнаставаная каранавірусная інфэкцыя.
Пра гэта паведамляе агенцтва РІА «Навіны» са спасылкай на прэс-службу Раскосмасу.
Каранавірус у Беларусі і ў сьвеце. Як разьвіваюцца падзеі >>
Ракетна-касьмічная карпарацыя «Энэргія» імя Каралёва — вядучае прадпрыемства ракетнай прамысловасьці РФ, створанае на базе АКБ-1 (Асобнага канструктарскага бюро), якое ў 1956-66 узначальваў акадэмік, генэральны канструктар Сяргей Каралёў.
Як і ягоны знакаміты папярэднік, Яўген Мікрын быў акадэмікам, уваходзіў у склад прэзыдыюму Расейскай акадэміі навук (РАН).
«Фактычна мы страцілі ключавога навукоўца, які адказваў за сувязь фундамэнтальнай навукі з практычным космасам», — распавёў ТАСС прэзыдэнт РАН Аляксандр Сяргееў.
ГЛЯДЗІЦЕ ТАКСАМА: Памёр Аляксей Лявонаў — першы чалавек, які выйшаў у адкрыты космасАкадэмік Мікрын удзельнічаў у распрацоўцы праграмнага забесьпячэньня для кіраваньня аб’яднанай рухальнай устаноўкай сыстэмы «Энэргія — Буран», сыстэмаў кіраваньня модулямі Міжнароднай касьмічнай станцыі, сыстэмамі кіраваньня апошніх пакаленьняў караблёў «Прагрэс» і «Саюз».
9 красавіка Мікрын прысутнічаў на пілятаваным запуску з касмадрома Байканур, падчас якога на МКС быў адпраўлены новы экіпаж, адзначае РІА «Навіны». На фотаздымках зь месца падзеяў ён сядзіць побач з кіраўніком Раскосмосу Дзьмітрыем Рагозіным. Касманаўты ад іх былі ізаляваныя.
ГЛЯДЗІЦЕ ТАКСАМА: Кіраўнік NATO: Расея і Кітай працягваюць дэзынфармаваць пра пандэмію