Прэзыдэнт ЗША Дональд Трамп працягвае заклікаць штаты хутчэй вярнуцца да нармальнага жыцьця, нягледзячы на засьцярогі з нагоды каранавірусу.
Усе 50 штатаў анансавалі хаця б частковае зьняцьце абмежаваньняў, якія згубна адбіліся на амэрыканскай эканоміцы. Трамп паабяцаў, што ў выпадку другой хвалі каранавірусу краіна закрытая ня будзе.
Выступаючы на заводзе Ford у Мічыгане, прэзыдэнт сказаў: «Перманэнтны карантын — не стратэгія для здаровага штату і здаровай краіны».
Трамп таксама адзначыў, што краіну чакае «трыюмфальнае адраджэньне».
ГЛЯДЗІЦЕ ТАКСАМА: У ЗША праходзіць 24-гадзінная онлайн-жалоба па памерлых ад COVID-19За апошнія дзевяць тыдняў па дапамогу ў беспрацоўі зьвярнуліся 38,6 млн амэрыканцаў.
Падчас візыту на аўтамабільны завод здарыўся інцыдэнт: Трамп адмовіўся надзець ахоўную маску, неягледзячы на тое, што прадстаўнікі мясцовай адміністрацыі некалькі разоў яго пра гэта прасілі. Трамп прынцыпова адмаўляецца насіць маску, хоць яе нашэньне рэкамэндуе фэдэральная ўлада ў якасьці прэвэнтыўнай засьцярогі.
Генпракурор штату Мічыган Дана Нэсэль рэзка скрытыкавала паводзіны Трампа, назваўшы яго «капрызьлівым дзіцем». Паводле яе, Трамп паставіўся да жыхароў штату Мічыган, у якім буяе каранавірус, «надзвычай непаважліва».
Trump refused to wear a face mask during his tour of the Ford plant in Ypsilanti today, despite numerous requests that he do so. Trump does not care about the safety of Michiganders. Luckily, we have an attorney general who does.https://t.co/RikMGXuHp7 pic.twitter.com/bfmkTokZcV
— Dana Nessel (@dananessel) May 21, 2020
Трамп апраўдваўся, што ў час наведваньня заводу ненадоўга надзеў маску і ахоўныя акуляры, але перад журналістамі зьявіўся бязь іх, бо «не хацеў даць прэсе задавальненьне гэта ўбачыць».
Ён прадэманстраваў журналістам, што мае цёмна-сінюю маску з прэзыдэнцкай эмблемай.
Прэзыдэнт ЗША таксама сказаў, што, нягледзячы на пандэмію, распрацоўваюцца пляны правядзеньня саміту «Вялікай сямёркі» у ЗША ў наступным месяцы.
«Калі мы будзем праводзіць саміт, то гэта, верагодна, будзе ў Вашынгтоне, у Белым доме, — распавёў прэзыдэнт журналістам перад выездам у Мічыган. — Але частка саміту можа прайсьці ў рэзыдэнцыі Кэмп-Дэвід, яна недалёка».